Fjarskiptamarkaðurinn tekur breytingum

Virði eigin fjár Vodafone er um 15,6 milljarðar sem jafngildir hlutabréfagengi 46,4. Virði Símans er að mati Capacent 27,2 milljarðar króna. Það jafngildir hlutabréfagenginu 2,8. Þetta kemur fram í greiningu Capacent á fjarskiptamarkaðnum. Síminn og Fjarskipti eru einu fyrirtækin á fjarskiptamarkaði sem eru skráð í Kauphöll Íslands.

Í greiningunni kemur fram að undan­farin fimm ár hafi tekjur stóru fjarskiptafélaganna þriggja, Símans, Fjarskipta og Nova, vaxið að meðaltali um 0,8 prósent árlega. Þar kemur líka fram að heildarvöxturinn sé minni en hagvöxtur á sama tímabili, en sé í takt við fólksfjölgun. En þrátt fyrir lítinn vöxt heildarinnar hafa verið töluverðar innbyrðis hreyfingar.

Nova hefur aukið hlutdeild sína á markaði úr 6 prósentum í 15 prósent. Síminn hefur lækkað um sex prósent og Vodafone um þrjú prósent.