Umfjöllun tífaldaðist eftir skráninguna

Skráning á First North getur verið kostnaðarsöm, en þetta er ferli sem margborgar sig. Það er mat Jim Carlsson, framkvæmdastjóra sænska tæknifyrirtækisins Clavister.

Carlsson hélt erindi á morgunverðarfundi Nasdaq Iceland, Nýsköpunarsjóðs atvinnulífsins og Icelandic Start­ups þann 4. febrúar síðastliðinn. Þar fór hann yfir skráningu fyrirtækisins á First North, kosti og galla þess og lærdóminn sem hægt er að draga af skráningunni.

Yfir 200 félög eru skráð á First North markaðinn, þar af voru 63 skráð í fyrra. First North virðist vera góður stökkpallur inn á Aðalmarkað, en frá árinu 2007 hafa 38 fyrirtæki færst yfir á Aðalmarkað. Einungis þrjú félög eru skráð á First North á Íslandi. Páll Harðarson, forstjóri Kauphallarinnar, hefur ítrekað lýst yfir áhuga fyrir því að sjá fleiri skráningar á First North.

Ákveðið var að skrá Clavister, sem stofnað var árið 1997, á markað árið 2014. Carlsson segir undirbúningsferlið hafa tekið sex til níu mánuði. Hann segir að ef eitthvað er hefði hann viljað skrá fyrirtækið á markaðinn fyrr.

Að mati Carlssons eru kostir og gallar við skráningu. Hann segir það erfiðasta við að vera skráð félag að geta ekki sagt frá því sem fyrirtækið er að gera. Skráning flæki samskipti bæði innan og utan dyra hjá fyrirtækinu. Aukinn kostnaður hafi líka áhrif.

„Það margborgaði sig þó fyrir okkur að skrá okkur á First North,“ segir Carlsson. Hann bendir til að mynda á að tíu sinnum meiri umfjöllun sé um fyrirtækið í fjölmiðlum eftir skráningu. Auk þess auðveldi skráning það að ná sér í fjármagn og byggi upp traust í kringum vörumerkið. Carlsson segir skráningu líka auðvelda það að ná í og halda í góða starfsmenn.

Carlsson segist hafa verið hissa á þeim fjölda sænskra fyrirtækja sem hafa verið skráð á markaðinn síðustu tíu ár. „Ég held að aukinn sýnileiki sé ein ástæða þess að Svíar sæki inn á markaðinn, aukin fjölmiðlaumfjöllun er markaðsvél fyrir okkur.“

Carlsson mælir með að þeir sem séu að huga að skráningu hitti forsvarsmenn fyrirtækja sem hafa skráð sig áður á markað og spyrji þá hvað þeir myndu gera öðruvísi. Clavister gerði þetta og lærði mikið af því.

Einn lærdómur sem Clavister dró af skráningarferlinu var að mikilvægt væri að allt fyrirtækið tæki þátt á fyrstu stigum skráningar. „Við vorum einungis með tíu manns í því, því hefði ég breytt.“

Clavister stefnir nú á skráningu á Aðalmarkað á þriðja eða fjórða ársfjórðungi þessa árs. Það ferli tekur svipaðan tíma og skráning á First North. Carlsson segir að hann myndi hiklaust fara í gegnum skráningarferlið á First North aftur og hvetur fleiri fyrirtæki til að nýta sér þennan fjármögnunarkost.