Saga ÁTVR tilbúin eftir áratug: Umræðan tafið útgáfu

Þótt ritun sögu ÁTVR sé lokið er enn alveg óvíst hvenær bókin kemur út. Tíu ár eru liðin frá því að ritun sögunnar hófst.

„Staðan er þannig að verkefnið er þannig séð búið,“ segir Sigrún Ósk Sigurðardóttir, aðstoðarframkvæmdastjóri ÁTVR. Nú eigi einungis eftir að taka ákvörðun um útgáfuna.

„Það verður að segjast eins og er að þessi mikla umræða sem hefur verið um afdrif fyrirtækisins hefur seinkað þeirri ákvörðun. Ef ég á að vera alveg hreinskilin,“ segir Sigrún Ósk.

Þar vísar hún í umræðu um afnám á einkarétti Vínbúðanna á sölu áfengis. Hún segir þessa umræðu þó ekki einu ástæðu seinkunarinnar. „En það er ekki því um að kenna. Það væri ósanngjarnt. En það hefur haft áhrif.“

Síðasta dag janúarmánaðar 2014 birti Fréttablaðið frétt um að kostnaður við ritun sögunnar yrði um 22 milljónir króna. Sigrún Ósk segir að sú kostnaðaráætlun haldist nánast óbreytt. Í fréttinni kom fram að byrjað var að huga að ritun sögu ÁTVR fyrir tíu árum, þótt kostnaðaráætlun hafi ekki verið gerð fyrr en árið 2006. Í ávarpi forstjóra ÁTVR í ársskýrslu verslunarinnar fyrir árið 2005 kom fram að áformað væri að sagan kæmi út á árinu 2007, þegar ÁTVR varð 85 ára.

Upphafleg kostnaðaráætlun, sem gerð var árið 2006, gerði ráð fyrir að ritun sögu ÁTVR kostaði 14,4 milljónir króna. Sú upphæð rann öll til fjögurra verktaka sem skrifuðu söguna. Fyrrverandi starfsmenn ÁTVR, sem aðstoðuðu við ritun sögunnar, fengu ekki greitt fyrir þá vinnu, að því er fram kemur í svari ÁTVR við fyrirspurn Fréttablaðsins.

Þrátt fyrir að verkið hafi dregist og ýmislegt breyst frá því að ákvörðun um ritun sögunnar var tekin, heldur Sigrún Ósk að sagan verði gefin út. „Það er svo sem ekki mitt nákvæmlega að ákveða það. En ég held að hún verði gefin út,“ segir Sigrún Ósk en bætir því við að það sé ekki hægt að segja nákvæmlega til um hvenær það gerist.

Kostnaður við verkið hefur ekki farið fram úr áætlunum þótt tölurnar í dag líti allt öðruvísi út en þær gerðu þegar áætlun var gerð 2006. Sé tekið tillit til verðlagsþróunar frá árinu 2006 hljóðaði upphafleg áætlun upp á 24,8 milljónir á verðlagi dagsins í dag.