Gríðarlegur innlagnaþungi og útskriftir ganga hægt

Þrátt fyrir að ávallt sé gert fyrir miklum önnum á Landspítalanum í upphafi hvers árs hefur nánast keyrt um þverbak síðustu daga, að sögn Páls Matthíassonar, forstjóra Landspítalans. Hann segir innlagnaþunga á spítalanum gríðarlegan og að útskriftir gengið hægar en æskilegt væri.

„Við vinnum hörðum höndum þessa dagana að tillögum um leiðir til að létta á þessum vanda sem blasir við til næstu vikna og mánaða. Öll vitum við að aðgerðir til lengri tíma eru nauðsynlegar en á þessum tímapunkti verðum við að bregðast við bráðri stöðu,“ segir Páll í forstjórapistli sínum.

Páll segir algengt að útskriftir gangi hægt, en bindur vonir við að hægt verði að taka á þeim vanda með auknum fjárframlögum sem nýta eigi í fráflæðisvanda Landspítala. „Einkum til að taka a þeim erfiðleikum sem því eru stundum samfara þegar útskrifa á eldra fólk sem lokið hefur meðferð á Landspítala.“

Þá segir hann að nýlega hafi verið tekið upp sameiginlegt, daglegt, stöðumat á spítalanum. Um sé að ræða stutta og markvissa tilkynningafundi þar sem farið sé yfir þá öryggisþætti sem mikilvægastir séu fyrir rekstur deilda Landspítala. Markmið þeirra sé að auka öryggi starfsfólks og sjúklinga, bæta upplýsingaflæði, auka aðstæðuvitund og stuðla að fyrirbyggjandi aðgerðum eftir því sem við eigi. „Fyrstu fundirnir hafa nýst vel við þær erfiðu aðstæður sem nú eru hjá okkur og ég bind væntingar við frekari þróun þessara funda.“