Tilkynnt um 40 til 50 tælingar árlega

Í fyrra bárust lögreglunni á höfuðborgarsvæðinu 27 tilkynningar um að reynt hafi verið að tæla barn upp í bíl. Í meðalári berast hins vegar 40 til 50 tilkynningar.

Árið 2014 voru tilkynningarnar 58. Áætlað er að fjöldinn verði svipaður í ár. Lögreglan á höfuðborgarsvæðinu segir miklar sveiflur á slíkum tilkynningum. Eftir umfjöllun í fjölmiðlum eykst fjöldi tilkynninga til muna. Stundum byggir þær á misskilningi. Dæmi séu um að bílstjórar bjóði börnum far eða spyrji til vegar.

Virðist sem að eftir mikla umfjöllun og umræðu um tælingar hafi börnin varann á og láti skóla eða foreldra vita af öllum grunsamlegum ferðum. Þau mál eru talin með í fjölda tilkynninga til lögreglu.

Í gær barst tilkynning um tælingu er ókunnur maður á svörtum jepplingi bauð níu ára dreng í Kópavogi upp í bíl og sagði móðir drengsins hafa lent í umferðarslysi. Barnið féll ekki fyrir blekkingunni heldur hljóp í skólann og tilkynnti málið til skólastjóra.

Mikilvægt að fræða en ekki hræða um tælingu

Hrefna Sigurjónsdóttir, framkvæmdastjóri Heimilis og skóla, segir mikilvægt að ræða hætturnar við börnin. Á heimasíðu samtakanna má finna gátlista með góðum ráðum um hvernig hægt sé að nálgast umræðuefnið.

„Fjölbreytt og hreinskilin fræðsla er besta forvörnin,“ segir Hrefna og hvetur foreldra til að gefa sér góðan tíma til umræðna. „Foreldrar þurfa að vera yfirvegaðir og undirbúa sig hvernig þeir svara alls kyns spurningum. Þetta má ekki gera í látum eða mála skrattann á vegginn.“

Lygasaga eins og í gær getur sannarlega valdið uppnámi hjá börnum með þeim afleiðingum að þau fari inn í bíl hjá ókunnugum.

Í Bandaríkjunum og víðar er algengt að foreldrar og börn hafi leyniorð sín á milli til að taka af allan vafa í svona aðstæðum. Hrefna segist ekki vita til þess að slíkt sé algengt á Íslandi. Hún segir best og öruggast að höfða til skynseminnar og efla gagnrýna hugsun hjá börnum.

„Það þarf að útskýra fyrir þeim að ef eitthvað kemur fyrir eða foreldrar geta ekki sótt þau í skólann þá myndi einhver í skólanum eða þeim nákominn láta þau vita, ekki einhver ókunnugur. Í þessu samhengi er mikilvægt að útskýra fyrir börnum hvað það þýðir að vera ókunnugur.“

Hrefna segir góða leið að æfa alls kyns aðstæður með leikþætti þar sem barnið er látið spreyta sig í viðbrögðum. Slíkar æfingar búi ekki til ótta heldur einmitt öryggi enda megi ekki gleyma því að börn vita oft meira en við höldum.

„Krakkar fylgjast með fréttum og verða mun hræddari ef enginn útskýrir fyrir þeim hvað hafi gerst. Það er betra að fá réttar upplýsingar og læra hvernig eigi að bregðast við en að ímynda sér mun verri og hræðilegri hluti."

Fréttin birtist fyrst í Fréttablaðinu