Kvennalandslið Noregs í handbolta er komið almennilega af stað eftir tapið óvænta gegn Brasilíu í fyrsta leik sínum á Ólympíuleikunum í Ríó í fyrradag.
Í kvöld hafði Noregur betur gegn Spánverjum, 27-24, eftir að verið með eins marks forystu í hálfleik, 11-10.
Norðmenn voru með undirtökin allan seinni hálfleikinn en enginn spilaði betur en skyttan Veronica Kristiansen sem skoraði sjö mörk í níu skotum, auk þess sem að hún var öflug í norsku vörninni.
Þórir Hergeirsson er þjálfari norska landsliðsins sem hefur unnið gull á tveimur síðustu Ólympíuleikum og er þar að auki ríkjandi heims- og Evrópumeistari.
Noregur tapaði einnig fyrsta leik sínum á HM í fyrra en vann svo alla leiki sem eftir var. Það er því spurning hvort að sú leið verði farin aftur nú hjá Þóri og leikmönnum hans.
Lið Þóris komið á sigurbraut
Tengdar fréttir
Ekki uppskrift íslenska þjálfarans
Þórir Hergeirsson segir að það sé ekki einhver taktík að tapa fyrsta leik á stórmóti því norsku stelpurnar hafa svo oft byrjað illa en endað mjög vel á þessum stóru mótum kvennahandboltans. Það gerðist á leiðinni að Ólympíugullinu fyrir fjórum árum og aftur um helgina í fyrsta leik á Ólympíuleikunum í Ríó.
