Á Degi íslenskrar náttúru

Dagur íslenskrar náttúru er í dag, 16. september. Það er ánægjulegt að á sama tíma sé umhverfis- og auðlindaráðuneytið að leggja lokahönd á tillögur að landsáætlun um uppbyggingu innviða til verndar íslenskri náttúru í samræmi við nýleg lög. Áætlunin hefur það að markmiði að bæta úr aðstöðu til að taka á móti ferðafólki víða um land. Skipulagning til langtíma er höfð að leiðarljósi en samhliða hef ég sett verkefnavinnu í gang til næstu 12 ára sem tryggir yfirsýn, hagkvæmni og sjálfbærni.

Sjálfbærni á víðar við. Í vikunni mælti ég fyrir á Alþingi þingsályktunartillögu um rammaáætlun þar sem ólík sjónarmið um náttúruvernd og orkunýtingu eru sett í farveg. Ég hef lagt ofuráherslu á að standa vörð um þetta stjórntæki og að það nái fram að ganga eins og lögin segja til um, að unnið sé til beggja handa. Rammaáætlun er ætlað að leggja stóru línurnar fyrir vernd og nýtingu orkukosta en tillagan er í senn áætlun um öflun sjálfbærrar orku, á sama tíma og hún er metnaðarfull verndaráætlun.

Sjálfbær orka er lykilhlekkur í því að takast á við loftslagsbreytingar. Í ágúst kynnti ég fullgildingu Parísarsáttmálans á ríkisstjórnarfundi og mælti utanríkisráðherra fyrir henni á Alþingi á dögunum. Er útlit fyrir að Ísland verði í hópi fyrstu 55 þjóðanna til að fullgilda samninginn.

Áskoranirnar í umhverfismálum eru margvíslegar en nýverið skrifaði ég undir samning við Samtök verslunar og þjónustu og kynnti aðgerðaáætlun til að draga verulega úr notkun burðarpoka úr plasti. Sem gamall kaupmaður finnst mér ánægulegt að ríkur vilji er meðal verslunarfólks til að draga vagninn í að minnka notkun plastpoka á næstu árum. Smám saman þurfum við að tileinka okkur að nýta hlutina oftar, sé þess kostur. Með réttu hugarfari getum við breytt miklu og fagna ég þeirri vitundarvakningu sem er orðin um matarsóun.

Hvort sem verkefnin eru stór og smá þá getur hvert og eitt okkar lagt okkar af mörkum. Megi Dagur íslenskrar náttúru verða hvatning til bættra umgengni.

Þessi grein birtist fyrst í Fréttablaðinu.