Lántökugjald fellt niður fyrir þá sem eru að kaupa sína fyrstu íbúð

Íslandsbanki hefur ákveðið að fella niður lántökugjald fyrir þá sem eru að kaupa sína fyrstu íbúð en þetta er gert í tilefni af því að viðskiptavinir bankans geta nú sótt um greiðslumat á netinu með rafrænni undirskrift.

Í tilkynningu frá bankanum segir að þetta sé liður í því að koma til móts við kröfur viðskiptavina sem vilja geta stundað bankaviðskipti hvar og hvenær sem er.

Niðurfelling lántökugjaldsins kemur til viðbótar lækkun á föstum verðtryggðum húsnæðislánavöxtum sem tóku gildi fyrr að mánuðinum, samkvæmt tilkynningu bankans.

„Sú áskorun sem flest íslensk þjónustufyrirtæki standa frammi fyrir er að mæta auknum kröfum um upplýsingagjöf og sjálfsafgreiðslu á netinu sem eykur skilvirkni fyrir alla aðila. Nú geta einstaklingar og fjölskyldur í fasteignahugleiðingum, með afar lítilli fyrirhöfn, mætt betur undirbúin á fasteignamarkaðinn.  Með því að slá inn eigin forsendur á vef Íslandsbanka liggja fyrir nákvæmar upplýsingar um greiðslubyrði lána, greiðslugetu lántakenda og hámarkskaupverð fasteigna,“ segir í tilkynningunni.