Þingrof hefði getað haft neikvæð áhrif

Það er jákvætt að útkoman eftir pólitískan óstöðugleika í síðustu viku hafi orðið sú að þing var ekki rofið. Þetta er mat Ashoks Bhatia, formanns sendinefndar Alþjóðagjaldeyrissjóðsins, sem kynnti yfirlýsingu sendinefndarinnar á Kjarvalsstöðum í gær.

Það sé jákvætt fyrir efnahagslífið að pólitískur óstöðugleiki síðastliðinnar viku hefði ekki sett allt í stopp.

Bhatia sagði að mikil vinna væri fram undan við afnám hafta, sem hefði með löggjafarvaldið að gera. Mikið ætti eftir að samþykkja af þingmálum vegna afnámsáætlunarinnar. Hann sagðist einnig trúa að nýkjörin ríkisstjórn í haust myndi halda áætluninni áfram þannig að framfarir yrðu í málinu.

Að mati Alþjóðagjaldeyrissjóðsins hefur ótvíræður árangur náðst í íslenska efnahagslífinu. Hagvöxtur hafi ekki mælst eins hár frá því fyrir bankakreppu og byggi nú á mun styrkari grunni.

„Við teljum að efnahagslegur árangur Íslands sé ótvírætt sterkur. Hagvöxtur hefur ekki verið betri síðan fyrir hrun. Fyrir hrun byggði hagvöxturinn á ósjálfbærri uppsveiflu, en byggir nú á styrkari stoðum. Þróun ferðaþjónustunnar er meðal stærri breytinga,“ sagði Bhatia.

Útlit er fyrir áframhaldandi góðan árangur í efnahagslífinu og að hagvöxtur stefni í 2,5 prósent til meðallangs tíma samkvæmt yfirlýsingu sendinefndarinnar. Öflug einkaneysla, fjárfesting og ferðaþjónusta munu halda áfram að knýja framleiðslu og atvinnusköpun. Skuldir ríkisins munu líklega koma til með að lækka verulega á komandi árum.

Óhóflegar launahækkanir munu þó líklega auka verðbólgu umfram verðbólgumarkmið Seðlabankans til skamms tíma litið. Gera má ráð fyrir auknu aðhaldi í peningastefnunni. Launahækkanir munu draga úr samkeppnishæfni. Þetta myndi ásamt lakari viðskiptakjörum valda minnkandi afgangi af viðskiptajöfnuði.

Þá telur Alþjóðagjaldeyrissjóðurinn að kjöraðstæður hafi skapast fyrir ný skref í afnámi fjármagnshafta. Bhatia sagði að tilefni væri til að heimila aukna erlenda fjárfestingu lífeyrissjóða. Hann sagði þó brýnt að framkvæma frekari losun hafta með varúð. Skynsamlegt sé að gera atlögu að aflandskrónuvandanum áður en athyglin beinist að innlendum aðilum.

Bhatia sagði mestu áhættuna í efnahagslífinu vera aðra kollsteypu eftir ofþenslu eins og áður hefði þekkst. Hann sagði að krafan um aukin ríkisútgjöld væri sífellt hærri, og benti á að nú væri kosninga að vænta fyrr en búist var við. „Ef nýlega uppstokkuð ríkisstjórn eða komandi ríkisstjórnir reyna að afla sér vinsælda í gegnum aukin ríkisútgjöld myndi það bætast við ríflegar launahækkanir og kynda undir innlendri eftirspurn sem hætta er á að sé of kröftug fyrir,“ sagði hann.

Fréttin birtist fyrst í Markaðnum 13. apríl