Snakktollurinn hverfur um áramótin

Um næstu áramót munu tollar á margvíslegum iðnaðarvörum falla niður. Tollar á þessum vörum eru á bilinu 4-20 prósent. Í mörgum tilvikum verður lítil breyting á verði innfluttra vara um áramótin. Ástæðan er sú að þær hafa að miklu leyti verið fluttar inn frá ríkjum sem Ísland hefur fríverslunarsamninga við.

Tollarnir sem leggjast af um næstu áramót eru oftast á bilinu 4-10 prósent. Dæmi um vörur sem hafa borið tolla við innflutning en verða tollfrjálsir frá og með 1. Janúar 2017 eru:

Sjónvörp, útvarpstæki og hljómtæki (7,5 prósent)

Leikföng og spil (10 prósent)

Húsgögn (10 prósent)

Ýmis íþróttabúnaður, til dæmis skíða-, golf- og stangveiðibúnaður (10 prósent)

Gasgrill (7,5 prósent)

Leðurvörur, reiðtygi o.fl. (10 prósent)

Snyrtivörur (10 prósent)

Barnavagnar (10 prósent)

Byssur og skotfæri (7,5 prósent)

Ýmsar plast- og gúmmívörur (4-10 prósent)

Mikið af þessum vörum er flutt inn án nokkurra tolla og þess vegna getur því verið snúið að átta sig á því hvaða vörur eiga að lækka í verði. Félag atvinnurekenda vill hvetja fyrirtæki til að skila lækkuninni að fullu til neytenda.

Þessar vörur eru allar í köflum 25 til 97 í tollskránni. Samkvæmt tölum frá fjármála- og efnahagsráðuneytinu nam innflutningur á vörum í þessum köflum tollskrárinnar 547 milljörðum árið 2015. 

Snakktollurinn hverfur

Einn tollur verður afnuminn um áramótin sem fellur ekki undir 25.-97. kafla tollskrárinnar. Það er 59 prósent tollur á kartöflusnakk. Alþingi samþykkti í desember árið 2015 að sá tollur skyldi afnuminn frá og með 1. Janúar 207.

Þegar þessar breytingar taka gildi munu eingöngu standa eftir tollar á matvöru, aðallega á kjöt- og mjólkurvörur sem framleiddar eru hér á landi. 

Hæsti prósentutollurinn sem lagður er á nokkra innflutta vöru er lagður á franskar kartöflur. Tollur á franskar er 76 prósent. Aðeins eitt fyrirtæki á Íslandi framleiðir franskar kartöflur og er það Þykkvabær.