Ítreka erfiðleika við kaup á íbúð

Í dag er staðan sú að sjaldan hefur verið erfiðara fyrir ungt fólk að eignast sína fyrstu fasteign að bóluárunum undanskildum. Þetta kemur fram í nýju efnahagsyfirliti VR.

Í yfirlitinu segir að greiningar á fasteignamarkaði sem sýni að ekki sé erfiðara að eignast sína fyrstu eign í dag en það var fyrir fimmtán til tuttugu árum, styðjist við gögn sem gefi ranga mynd af því hversu erfitt sé fyrir ungt fólk að eignast íbúð í dag.

Hlutfall verðs í fjölbýli og útborgaðra árslauna fólks á aldrinum 25-34 ára er til að mynda nú litlu lægra en það var 2005 en það er mesta bóluár sögunnar á fasteignamarkaði. Auk þess torveldi aðrir þættir svo sem hátt leiguverð ungu fólki að safna fyrir útborgun sinnar fyrstu íbúðar.