Landsvirkjun hættir við boðaðar takmarkanir á orkuafhendingu

Landsvirkjun hefur ákveðið að draga til baka boðaðar takmarkanir á afhendingu rafmagns til viðskiptavina. Þetta er gert í ljósi bættrar miðlunarstöðu eftir mikið innrennsli í miðlunarlón í september.

Í tilkynningu frá Landsvirkjun segir að staða í miðlunum fyrirtækisins í lok ágúst hafi verið slæm, sérstaklega í Hálslóni og í ljósi stöðunnar var tilkynnt til viðskiptavina með mánaðar fyrirvara að líklegast þyrfti að nýta ákvæði í samningum og draga úr raforkuframboði í vetur.

„Septembermánuður var mjög hlýr á öllu landinu en landsmeðalhiti var yfir meðallagi síðustu 10 ára. Hlýindi fyrri hluta mánaðarins höfðu mikil áhrif á innrennsli til miðlana og tók jökulleysing vel við sér.

Þann 13. september mældist t.d. hæsta dagsmeðaltal innrennslis til Hálslóns í 580 m³/s, en það er mesta innrennsli sem mælst hefur í september frá því miðlunin var tekin í notkun,“ segir í tilkynningunni.