Nær allir geislafræðingarnir hafa sótt um starfið aftur

Nánast allir þeir geislafræðingar sem sögðu upp á Landspítalanum og hættu störfum í byrjun mánaðar hafa sótt um starf aftur. Alls sögðu 25 geislafræðingar upp störfum og hættu 17 þeirra í byrjun mánaðar.

Störf geislafræðinga voru auglýst með umsóknarfresti til 21.september. Fyrir þann tíma bárust 15 umsóknir, en þær héldu áfram að berast eftir þann tíma og var því ákveðið að auglýsa aftur, að því er segir á vef Landspítalans.

Þar segir jafnframt að rúmlega 30 umsóknir hafi nú borist og að sumar þeirra séu erlendis frá. Greint var frá því á Vísi í gær, þegar 15 umsóknir höfðu borist, að 12 þeirra væru erlendis frá, eða frá Spáni og Bretlandi.

Díana Óskarsdóttir, deildarstjóri röntgendeildar, segir útlitið allt annað og betra og að fari sem fram horfi verði röntgendeildin aftur fullmönnuð þegar kemur fram í október.