Spánverjar og Bretar sækja um stöður geislafræðinga

Tólf af fimmtán umsóknum sem bárust um stöður geislafræðinga á Landspítalanum eru frá Spánverjum og Bretum. Deildarstjóri röntgengdeildar segir útlit fyrir að einhverjir þeirra komi til starfa á spítalanum á næstu vikum.

Tuttugu og fimm geislafræðingar sögðu upp störfum á Landspítalanum í sumar vegna kjaradeilu þeirra og ríkIsins. Hluti þeirra dró uppsagnir sínar til baka en uppsagnir 17 geislafræðinga, eða um fjórðungs þeirraa geislafræðinga sem hafa starfað á spítalanum, stóðu og komu til framkvæmda 1. september. Rúmar þrjár vikur eru síðan geislafræðingarnir 17 hættu á Landspítalanum og hefur brotthvarf þeirra haft töluverð áhrif á starfsemi spítalans.

„Þetta er búið að vera erfitt og við erum búin að vera undirmönnuð en bara með jákvæðu starfsfólki og með samheldni þá hefur þetta gengið en að sjálfsögðu hefur þetta verið erfitt,“ segir Díana Óskarsdóttir deildarstjóri á röntgendeild Landspítalans.

Hún segir starfsemi röntgendeildarinnar hafa verið skerta þessar þrjár vikur og biðlista eftir því að komast í rannsóknir hafa lengst. „Það náttúrulega gengur allt hægar hérna hjá okkur og fólk þarf að bíða lengur eftir því að fá tíma,“ segir Díana

Til að deildin sé fullmönnuð þarf að ráða í fjórtán stöður geislafræðinga. Auglýst var eftir geislafræðingum og rann umsóknarfrestur út á miðnætti á mánudaginn. „Við fengum 15 umsóknir áður en umsóknarfrestur rann út en síðan hafa einhverjar umsóknir verið að berast eftir það,“ segir Díana.

Nokkrir þeirra geislafræðinga sem sögðu upp á spítalanum í sumar eru á meðal umsækjanda. Þá hafa fleiri af þeim haft samband eftir að umsóknarfresturinn rann út. Díana segir að ákveðið hafi verið að auglýsa aftur svo þeir geti sótt um. Stærstur hluti þeirra umsókna sem þegar hefur borist eru hins vegar frá Bretum og Spánverjum og er útlit fyrir að einhverjir þeirra verði ráðnir til starfa á spítalanum.

„Við munum alveg eins gera það ef okkur líst svo á. Við eigum eftir að fara í gegnum þessar umsóknir og taka viðtal við alla sem sækja um. Við erum með um tólf umsóknir, erlendar umsóknir. Við erum að fá umsóknir frá Spáni og frá Bretlandi,“ segir Díana.

Díana vonast til að hægt verði að ganga frá ráðningum á næstu dögum og vikum. „Ég er að vonast til þess að í október verðum við komin með fulla starfsemi á deildina aftur. Það er mín von og trú,“ segir Díana Óskarsdóttir.