Birkir Kristinsson og félagar fyrir Hæstarétt í nóvember

Mál sérstaks saksóknara gegn Birki Kristinssyni, Jóhannesi Baldurssyni, Elmari Svavarssyni og Magnúsi Arnari Arngrímssyni verður flutt í Hæstarétti þann 6. nóvember næstkomandi.

Dómur gekk í héraði í málinu í júní í fyrra en fjórmenningarnir eru allir fyrrverandi starfsmenn Glitnis. Þeir hlutu þunga fangelsisdóma fyrir markaðsmisnotkun, umboðssvik og brot á lögum um ársreikninga.

Birkir, sem er fyrrverandi landsliðsmarkvörður í fótbolta, var dæmdur í fimm ára fangelsi fyrir aðild sína að málinu. Það snerist um 3,8 milljarða lánveitingu Glitnis til félagsins BK-44 í nóvember 2007 en félagið var í eigu Birkis sem var viðskiptastjóri einkabankaþjónustu Glitnis. Jóhannes og Elmar voru einnig dæmdir í fimm ára fangelsi og Magnús Arnar hlaut fjögurra ára dóm.

Ákæran á hendur fjórmenningunum var í sex liðum. Í fyrsta lagi voru Jóhannes, Magnús og Elmar ákærðir fyrir umboðssvik með því að veita BK-44 lánið til að kaupa bréf í bankanum. Bréfin voru keypt aftur af Birki sumarið 2008 á yfirverði, samkvæmt ákæru, og var tjónið af því metið á 1,9 milljarða.

Í öðru lagi voru Elmar og Jóhannes ákærðir fyrir umboðssvik með því að gera „munnlegan samning við ákærða Birki um skaðleysi félags hans“ – að hann gæti ekki tapað á viðskiptunum vegna þess að bréfin yrðu keypt aftur seinna á gamla verðinu óháð markaðsvirði.

Samkvæmt ákærunni fékk Birkir raunar meira en það sem hann hafði fengið að láni til baka og græddi 86 milljónir á viðskiptunum. Í þriðja lið var Elmar ákærður fyrir umboðssvik með því að standa þannig að uppgjöri samningsins.

Í fjórða lið var Birkir ákærður fyrir hlutdeild í umboðssvikunum, en til vara hylmingu og peningaþvætti, „með því að hafa lagt á ráðin með meðákærðu“ um fléttuna. Honum hafi hlotið, sem starfsmanni bankans, að vera ljóst að viðskiptin væru óeðlileg og brytu í bága við reglur bankans.

Í fimmta ákærulið var Jóhannesi, Elmari og Birki gefin að sök markaðsmisnotkun, þar sem viðskiptin hafi byggst á „blekkingum og sýndarmennsku“ og verið líkleg til að gefa markaðnum villandi hugmynd um eftirspurn bréfa í bankanum.

Í síðasta liðnum var Birkir ákærður fyrir „meiriháttar brot gegn ársreikningalögum“ með því að greina ekki að nokkru leyti frá láninu í ársreikningi BK-44 fyrir árið 2007.

Uppfært 18. október: Í upphaflegri útgáfu fréttarinnar var sagt að málið yrði tekið fyrir í Hæstarétti þann 6. desember. Var það samkvæmt upplýsingum frá ríkissaksóknara en málið er nú komið á dagskrá Hæstaréttar þann 6. nóvember næstkomandi.