Geislafræðingar með áratuga reynslu ekki endurráðnir

Sex geislafræðingar með áratuga reynslu, sem sögðu upp hjá Landspítalanum í verkfallinu í vor en sóttu aftur um vinnu eftir að gengið var frá kjarasamningum, verða ekki endurráðnir heldur verða erlendir starfsmenn ráðnir í þeirra stað.

Tuttugu og fimm geislafræðingar sögðu upp störfum á Landspítalanum í tengslum við verkfallið í sumar. Hluti þeirra dró uppsagnir sínar til baka þegar samningar náðust, einhverjir leituðu á önnur mið en aðrir sóttu aftur um stöður á Landspítala. Þeirra á meðal konur sem allar hafa starfað um árabil á spítalanum.

„Við erum sex sem vorum ekki endurráðnar inn. Þrátt fyrir mikla starfsreynslu og skort á geislafræðingum. Við fórum í atvinnuviðtal þrátt fyrir að vera með langa reynslu. Einhverjir fóru áfram í viðtal númer tvö en þeir sem ekki fóru í annað viðtal fengu ekki ráðningu,“ segir Ragnheiður Pálsdóttir geislafræðingur.

Mikill skortur hefur verið á Geislafræðingum undanfarið og lítil endurnýjun í stéttinni. Landspítalinn auglýsti eftir geislafræðingum í útlöndum og fengu konurnar þær svör að búið væri að ráða erlenda einstaklinga í þeirra stöður.

„Ég er ekki að segja að þetta fólk sé ekki hæft, ég efast ekkert um það. En mér finnst bara skrítið að fá okkur ekki bara inn og klára málið. Fólk sem er vant og þekkir til,“ segir Ragnheiður.