Sakar leiðtoga araba um að ýta undir ofbeldi

Þrjár hnífaárásir voru gerðar í Jerúsalem í dag. Benjamin Netanyahu, forsætisráðherra Ísrael, sakar leiðtoga araba í Ísrael um að ýta undir ofbeldi í landinu. Hann hvetur íbúa til að reka öfgamenn á brott. Tveir af árásarmönnunum voru felldir af lögreglu í dag, en þeir voru palestínskir táningar, 13 og 15 ára gamlir.

Undanfarin misseri hefur hnífaárásum í Ísrael fjölgað gífurlega.

Táningarnir tveir réðust á tvítugan mann í Jerúsalem og særðu hann alvarlega. Þá réðust þeir á ísraelskan táning og er hann sagður á sjúkrahúsi og í lífshættu. Annar árásarmannanna var skotinn til bana af lögreglu en hinn varð fyrir bíl á flótta. Í annarri árás særði 16 ára stúlka lögregluþjón áður en hún var særð af öðrum lögregluþjónum.

Í þriðju árásinni var 17 ára drengur skotinn til bana af lögreglu.

Aukin byssusala í Ísrael

Samkvæmt AP fréttaveitunni hafa fimm Ísraelar látið lífið í óöldinni. Hins vegar hafa minnst 25 Palestínumenn látið lífið. Þar af tíu árásarmenn. Hundruð hafa særst í átökum við hermenn á Vesturbakkanum.

Árásirnar hafa valdið mikilli ókyrrð í Ísrael, þar sem íbúar kaupa nú byssur í massavís. Þeir sem fremja árásirnar hafa aldrei verið tengd við öfgasamtök og þær virðast vera af algjöru handahófi.