Mundi ekkert um aðkomu Hreiðars að hundruð milljóna lánveitingum

Guðmundur Þór Gunnarsson, sem var viðskiptastjóri á útlánasviði Kaupþings, taldi að skuldabréfaviðskipti sem bankinn kom að á vikunum fyrir hrunið 2008 væru góð fyrir bankann og myndu styrkja stöðu hans. Þá taldi hann að þau vera áhættulítil fyrir Kaupþing. Þetta kom fram þegar Guðmundur bar vitni í CLN-málinu í Héraðsdómi Reykjavíkur í morgun.

Í málinu eru þeir Hreiðar Már Sigurðsson, fyrrverandi forstjóri Kaupþings, og Sigurður Einarsson, fyrrverandi stjórnarformaður bankans, ákærðir fyrir 510 milljóna evra lán sem bankinn veitti eignalitlum eignarhaldsfélögum frá ágúst til október 2008. Þá er Magnús Guðmundsson, fyrrverandi forstjóri Kaupþings í Lúxemborg, ákærður fyrir hlutdeild í meintum umboðssvikum Hreiðars og Sigurðar.

Sagði Hreiðar og Bjarka hafa almennt gefið fyrirmæli um útgreiðslu lána

Þremenningarnir eru ákærðir fyrir nokkrar lánveitingar, þar á meðal þrjú lán Kaupþings á Íslandi til þriggja félaga í eigu vildarviðskiptavina bankans sem veitt voru þann 29. ágúst 2008. 

Félögin notuðu peningana til að greiða upp lán við Kaupþing í Lúxemborg en þau lán voru notuð sem eiginfjárframlög í nýtt eignarhaldsfélag, Chesterfield, sem keypti skuldabréf af Deutsche Bank en bréfið var tengt skuldatryggingarálagi Kaupþings.

Guðmundur kvaðst fyrir dómi í dag ekki vita hver fyrirskipaði lánveitingar Kaupþings á Íslandi til félaganna þriggja. Hann sagði að almennt hefði það þó verið þannig að Hreiðar Már eða Bjarki Diego, framkvæmdastjóri útlánasviðs, gæfu fyrirmæli um útgreiðslu lána.

Aðspurður hvort hann vissi hvernig lánin voru tryggð sagði Guðmundur ekki muna nákvæmlega hver strúktúrinn í viðskiptunum hafi verið.

 

„Ég hef bara Hreiðar Má“

Björn Þorvaldsson, saksóknari, spilaði símtal sem hlerað var við rannsókn málsins en þar ræddu Guðmundur Þór og Bjarki Diego um lánveitingarnar:

BD: Þannig að Halldór hafi sem sagt fengið staðfestingu frá Hreiðari um að það mætti greiða þetta út?

GÞG: Já, mér finnst það líklegt.

Aðspurður hvers vegna honum hafi þótt líklegt að fyrirmæli um útgreiðslu hafi komið frá Hreiðari Má sagðist Guðmundur ekki vita það. Í öðru símtali, sem er frá því í ágúst 2008, ræddi Guðmundur um lánin við Sölva Sölvason, lögfræðing hjá Kaupþingi í Lúxemborg. Þar sagðist hann þurfa að ræða málið við Hreiðar og Magnús og Sölvi segir honum að gera það endilega en bætti við að Magnús hafi sagt sér að vera í sambandi við Guðmund.

GÞG: Já, ég veit það. Ég hef bara Hreiðar Má.

SS: Já [hlær] og þá segir Hreiðar, já talaðu bara við Magga.

„Bankastjórinn er búinn að samþykkja það“

Í kjölfar símtalsins ítrekaði saksóknari spurningu sína um hvort að fyrirmæli um lánveitingarnar hafi komið frá Hreiðar en Guðmundur mundi það ekki. Þá mundi hann ekki heldur hvort hann hafi mest verið í sambandi við Hreiðar Má vegna viðskiptanna.

Í enn öðru símtali við Sölva í ágúst 2008 segir Guðmundur að Hreiðar Már vilji ekki taka lánin til eignarhaldsfélaga fyrir í lánanefnd en fyrir dómi útskýrði hann orð sín þannig að hann taldi þetta hafa verið spurningu um tíma. Í símtalinu segir Guðmundur jafnframt við Sölva að Kaupþing í Lúxemborg verði að framlengja lán sín til eignarhaldsfélaganna um viku og bætti við: „Bankastjórinn er búinn að samþykkja það.“ Fyrir dómi mundi Guðmundur ekkert eftir þessu.

Hörður Felix Harðarson, verjandi Hreiðars Más, spurði Guðmund hvort að hann hafi einhvern tímann á ferli sínum hjá Kaupþingi fengið fyrirmæli frá Hreiðari um að veita lán og þá með þeim formerkjum að samþykki lánanefndar væri óþarft. Svaraði Guðmundur því neitandi og bætti við að hann væri nokkuð viss um að hafa aldrei fengið slík fyrirmæli.