Nú förum við að vona að stormviðvörunum sé lokið í bili og sumarið fari að láta á sér kræla. Það er þó enn kalt úti og þá er tilvalið að gæða sér á ljúffengri fiskisúpu að hætti Evu Laufeyjar og brakandi fersku heimabökuðu brauði með basilíkupestói.

Matarmikil sjávarréttasúpa með taílensku yfirbragði

2 rauð chili-aldin, fræhreinsuð og skorin í bita

4 hvítlauksrif

6 cm fersk engiferrót

40 g ferskt kóríander

½ tsk. kóríanderfræ

3 msk. olía

700 g kókosmjólk

5 dl vatn

1½ fiskiteningur

½–1 tsk. fiskisósa

500 g fiskur t.d. langa

20–25 risarækjur, ósoðnar

200 g heilhveitinúðlur, soðnar skv. leiðbeiningum á pakka

3 vorlaukar, fínt sneiddir

1 grænt chili-aldin, fræhreinsað

Ferskt kóríander til skrauts



Maukið chili, hvítlauk, engiferrót, kóríanderfræ og 1 msk. af olíu saman í matvinnsluvél. Hitið olíu í potti og steikið kryddmauk í 1–2 mínútur.

Bætið kókosmjólk, vatni og fiskikrafti út í, látið sjóða við vægan hita í 10 mínútur. Bætið fiskisósu út í og síðan fiskinum og rækjunum og látið sjóða í 2–3 mínútur.

Setjið núðlur í botninn á skálum, ausið súpunni yfir og setjið vorlauk og grænt chili ofan á. Skreytið með fersku kóríander.