Litríkri lesningu fagnað

„Þetta er skemmtileg og litrík lesning, efnið snýst um allt frá fatahönnun yfir í keramik, og skart yfir í borgarskipulag,“ segir Arnar Fells, ritstjóri nýs tímarits sem heitir HA.

Útgáfu tímaritsins var fagnað í gær en það fjallar um hönnun og arkitektúr og er gefið út af Hönnunarmiðstöðinni sem níu aðildarfélög standa að.

Tímaritið er veglegt, 128 síður að stærð og prentað á mjúkan pappír, skrifað á tveimur tungumálum, íslensku og ensku, og skreytt mörgum myndum úr hinum ýmsu kimum hönnunar, eins og Arnar ritstjóri bendir á.

Æ fleiri skilja nú mikilvægi hönnunar því vitundarvakning hefur orðið á því sviði, eins og segir í formála ritsins. Þaðan er líka eftirfarandi setning:

„Við viljum efla almennan áhuga á hönnun og arkitektúr með því að sýna áhrif greinanna og mikilvægi þeirra.“

„HA mun verða vettvangur gagnrýninnar hugsunar og stuðla að aukinni þekkingu á hönnun og arkitektúr. Hvað er meira viðeigandi en að tengja nafn slíks tímarits við spurnarorðið ha? Hið sérkennilega íslenska orð sem lýsir undrun og fróðleiksfýsn, sem eru einmitt dyggðir skapandi fólks.“