QuizUp: NBC leitaði að byltingarkenndum þætti

„Það þekkja allir þessa tilfinningu að sitja fyrir framan spurningaþátt og vilja vera í sætinu að svara spurningum,“ segir Þorsteinn B. Friðriksson, forstjóri og stofnandi QuizUp sem tilkynnti í dag að framleiddir yrðu spurningaþættir í samstarfi við bandarísku sjónvarpsstöðina NBC.

Þorsteinn segir að NBC hafi verið að leita að nýjum spurningaþætti og að sjónvarpsstöðin, sem er ein sú stærsta í Bandaríkjunum, hafi leitað til QuizUp að fyrra bragði en að hugmyndin um sjónvarpsþætti tengda QuizUp hefði lengi verið í kollinum á aðstandendum QuizUp.

„Það var ekki eins og þetta væri hugmynd sem kom allt í einu upp,“ segir Þorsteinn. Frá því að við gáfum út leikinn fyrst hafa framleiðendur út um allan heim haft samband við okkur með hugmyndir um að framleiða þátt sem væri hægt að selja sjónvarpsstöðvum. NBC heyrði svo í okkur og við ræddum við þá.“

Spurningaþættirnir malla áfram og ganga mjög lengi

NBC var að sögn Þorsteins að leita að byltingarkenndum þætti en vandamálið við spurningaþætti nú til dags er sá að áhorfendahópurinn sé í eldri kantinum. Þeir geti þó orðið mjög vinsælir og eigi það til að ganga leiki en til að mynda hefur spurningaþátturinn Jeopardy verið sýndur í bandarísku sjónvarpi, með hléum, frá árinu 1964.

„Ef að spurningaþættir verða vinsælir eru þeir rosalega góðir fyrir sjónvarpsstöðvar vegna þess að þeir ganga mjög lengi, þetta eru ekki eins og venjulegar sjónvarpsþáttaraðir eins og t.d. Lost þar sem ein sería klárast og þá þarf að skrifa nýja þætti. Það hefur ekki komið spurningaþáttur sem höfðar til yngri hópa og af þessu hafa sjónvarpsstöðvarnar áhyggjur,“ segir Þorsteinn um ástæður þess að NBC hafi leitað til QuizUp.

Verða sýndir á besta tíma í Bandaríkjunum

Þátturinn verður sýndur á besta tíma í bandarísku sjónvarpi, klukkan 20.00, og er búist við að sýningar hefjist næsta vor. Þorsteinn er mjög spenntur fyrir framhaldinu og segir þetta stórt skref fyrir QuizUp.

„Fyrir utan það náttúrulega að þetta heitir QuizUp og skartar okkar vörumerki þá gengur leikurinn út á það að þú ert með keppanda í sjónvarpssal sem er að keppa á móti fólki heima í stofu sem er að nota appið.“

Fyrirkomulag þáttanna er þannig að ef þátttakandi í upptökuveri NBC vinnur átta spurningalotur gegn átta ólíkum keppendum, sem geta verið staddir hvar sem er innan Bandaríkjanna, þá geta þeir unnið allt að eina milljón dala.

Ef einhverjir af andstæðingunum í heima í stofu vinna sínar lotur, þá hljóta þeir upphæðina sem í boði var fyrir þá lotu. Þeir sem vilja etja kappi við þátttakanda vikunnar í upptökuverinu og eiga möguleika á að hljóta verðlaunaféð munu geta komist í pott með því að keppa í ákveðnum spurningaflokkum í QuizUp appinu vikuna fyrir hvern þátt.