Kínverjar ekki hræddir við stríð

Kínverjar eru ekki hræddir við að fara í stríð við Bandaríkin vegna deilna um yfirráð á Suður Kínahafi. Þessu er haldið fram í dagblaði í landinu sem haldið er úti af kommúnistaflokki landsins. Í blaðinu eru Bandaríkin sökuð um að storka Kínverjum en herskipið USS Lassen sigldi inn fyrir tólf mílna landhelgi Spratly eyjaklasans sem Kínverjar hafa slegið eign sinni á, í óþökk nágrannaríkja.

Í ritstjórnargrein blaðsins eru stjórnvöld í Beijing hvött til að taka hart á yfirgangi Bandaríkjamanna og búa sig undir það versta. Það muni sýna Bandaríkjunum að Kínverjar séu staðráðnir í að vernda hagsmuni sína á svæðinu og halda virðingu sinni.

Samkvæmt alþjóðalögum mega herskip sigla í gegnum hafstjórnarsvæði annarra ríkja, sé tilgangur þeirrar ferðar „saklaus“. Bandaríkin höfðu þó gefið út fyrirfram að tilgangur siglingarinnar væri að mótmæla kröfum Kína á hafsvæðinu, eftir að þeir byggðu eyjar þar.

Kínverjar hafa brugðist við siglingu Lassen með miklum áróðri og segja siglinguna hafa ógnað friði og stöðugleika á svæðinu. Þeir segja einnig að atvikið hafi skaðað samband Kína og Bandaríkjanna og sendirherra Bandaríkjanna hefur verið kallaður á fund stjórnvalda í Beijing.