Selfyssingur er langmarkahæstur í Olís-deild kvenna í vetur

Hrafnhildur Hanna Þrastardóttir, nítján ára leikmaður Selfoss, varð langmarkahæsti leikmaður fyrri umferðar Olís-deildar kvenna sem lauk um síðustu helgi. Hrafnhildur Hanna skoraði 87 mörk í fyrstu ellefu umferðunum eða 7,9 mörk að meðaltali í leik.

Hrafnhildur Hanna skoraði níu mörk í naumu tapi á móti Val um síðustu helgi en þetta var sjötti leikurinn í vetur þar sem hún skorar átta mörk eða meira. Mest skoraði hún fjórtán mörk í einum leik en það var á útivelli á móti toppliði Fram.

Hrafnhildur Hanna hefur skorað fimmtán mörkum meira en sú næsta á listanum sem er Haukakonan Marija Gedroit. Martha Hermannsdóttir hjá KA/Þór er síðan í þriðja sætinu með 68 mörk. Upplýsingar um markaskor leikmanna koma frá heimasíðum HSÍ.

Frammistaða Hrafnhildar Hönnu hefur ekki farið fram hjá landsliðsþjálfaranum sem valdi hana í fyrsta sinn í A-landsliðið fyrir áramót. Hrafnhildur Hanna spilaði sinn fyrsta leik og skoraði sitt fyrsta mark í 28-22 sigri úti í Makedóníu í undankeppni HM.

Eyjakonur eiga flesta leikmenn á topp tuttugu, eða fimm, sem gerir 25 prósent af markahæstu leikmönnum deildarinnar. Ekkert annað félag á fleiri en tvo leikmenn meðal tuttugu efstu.

Markahæstar í Olís-deild kvenna:

Hrafnhildur Hanna Þrastardóttir, Selfoss    87

Marija Gedroit, Haukar    72

Martha Hermannsdóttir, KA/Þór    68

Vera Lopes, ÍBV    67

Sigurbjörg Jóhannsdóttir, Fram    62

Patricia Szölösi, Fylkir    60

Brynhildur Kjartansdóttir, ÍR    59

Karólína Bæhrenz Lárudóttir, Grótta    58

Karen Helga Díönudóttir, Haukar    55

Kristín Guðmundsdóttir, Valur    55

Ragnheiður Júlíusdóttir, Fram    54

Díana Dögg Magnúsdóttir, ÍBV    52

Ester Óskarsdóttir, ÍBV    50

Ingibjörg Pálmadóttir, FH    50

Telma Silva Amado, ÍBV    48

Thea Imani Sturludóttir, Fylkir    48

Sigurlaug Rúnarsdóttir, Valur    47

Solveig Lára Kjærnested, Stjarnan    46

Jóna Sigríður Halldórsdóttir, ÍBV    46

Emma Havin Sardarsdóttir, HK    46