Einkunnir Gaupa: Leikmaður í Olís-deildinni með betri mönnum liðsins á HM

Ísland tapaði fyrir Tékklandi með ellefu marka mun, 25-36, í fjórða leik liðsins á HM 2015 í Katar. Gjörsamlega ömurleg frammistaða hjá okkar mönnum í dag.

Eftir hvern leik íslenska liðsins mun Guðjón Guðmundsson, handboltasérfræðingur Stöðvar 2 Sports, gefa leikmönnum og þjálfaranum einkunnir.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Tékklandi:

Björgvin Páll Gústavsson - 3

Hann varði 39 prósent skotanna sem hann fékk á sig, en í raun var manninum vorkunn að standa fyrir aftan hripleka vörn Íslands og fá hraðaupphlaup í andlitið trekk í trekk.

Guðjón Valur Sigurðsson - 1

Líklega versti landsleikur fyrirliðans frá upphafi. Hefur ekki fundið takt í mótinu eða í þessu liði Íslands. Brenndi af öllum sex skotum sínum í dag. Takið eftir; við erum að tala um besta hornamann heims.

Aron Pálmarsson - 1

Fann engan takt í sinn leik. Byrjaði leikinn mjög illa og virtist missa móðinn og skorti sjálfstaust. Við erum að tala um einn besta handboltamann heims. Fór af velli meiddur í fyrri hálfleik.

Snorri Steinn Guðjónsson - 3

Sá eini af útilínunni sem náði að halda haus. Var maðurinn á bakvið flest mörkin í leiknum. Hefði þurft að vera með betri skotnýtingu.

Alexander Petersson - 1

Líkt og Guðjón Valur hefur Alexander Petersson ekki fundið takt í þessu móti. Virkar óöruggur í öllum sínum aðgerðum og virðist ekki líða vel inn á vellinum.

Ásgeir Örn Hallgrímsson - 1

Náði ekki að fylgja eftir góðum leik gegn Frökkum. Virtist óöruggur og í raun ekki að átta sig á hvaða hlutverk hann hafði í leiknum.

Róbert Gunnarsson - 3

Skilaði sínu en kannski má spyrja sig hvers vegna hann lék ekki meira. Við höfum því miður ekki svör við því. Kláraði færin sín vel.

Sverre Andreas Jakobsson - 1

Lék vel gegn Frakklandi þar sem hann barði liðið áfram en virtist algjörlega úti á þekju í dag.

Bjarki Már Gunnarsson - 2

Reyndi allt hvað hann gat en það sást langar leiðir þegar líða fór á leikinn að honum skortir reynslu og líkt og aðrir missti hann móðinn.

Stefán Rafn Sigurmannsson - 3

Skoraði úr báðum skottilranum sínum í leiknum. Leikmaður sem við þurfum að horfa á með framtíðina í huga. Mætti spila meira - sérstaklega í þessum leik.

Arnór Atlason - 1

Kom kannski full seint inn miðað við byrjun íslenska liðsins en því miður fann hann aldrei takt í sinn leik og skaut oftar í varnarvegginn en á markið sjálft.

Sigurbergur Sveinsson - 1

Miðað við frammistöðuna á HM það sem af er á Sigurbergur langt í land. Gleymum því þó ekki að hann hefur leikið vel í Þýskalandi og hefur hæfileika. Hvar eru þeir?

Arnór Þór Gunnarsson - 2

Það var krafa að gefa Arnóri tækifæri í liðinu fyrir þetta heimsmeistaramót og hann var valinn á kostnað Þóris Ólafssonar. Það var röng ákvörðun.

Kári Kristján Kristjánsson - 3

Verður ekki sakaður um að leggja sig ekki fram. Það hlýtur að vera umhugsunarefni þegar leikmaður sem spilar í Olís-deild karla á Íslandi sé einn af betri mönnum liðsins.

Vignir Svavarsson - 2

Hefur skilað sínu í sókninni þegar hann fær tækifæri en eins og aðrir varnarmenn íslenska liðsins nær hann varla að klukka andstæðinganna. Skorar tvö mörk úr tveimur skotum sem rífa hann upp úr kjallaranum.

Aron Rafn Eðvarðsson - 2

Varði fimm skot af 19 sem gera 26 prósent. Eins og með Björgvin var honum vorkunn að standa fyrir aftan þessa vörn í dag.

Aron Kristjánsson - 1

Liðið spilaði „júggafærslur“ nánast allan leikinn og sótti alltaf inn á miðjuna. Íslenska liðið virkaði andlaust og það mætti ekki til leiks. Það er ekki hægt að skella skuldinni á þjálfarann alfarið, en hann auðvitað ber ábyrgð á frammistöðunni og hvernig liðið hefur leikið ásamt reynslumestu leikmönnum liðsins. Þeir verða líka að taka á sig ábyrgð.

Útskýring á einkunnum:

6 - Heimsklassa frammistaða

5 - Frábær frammistaða

4 - Góð frammistaða

3 - Sæmileg frammistaða - skilaði sínu

2 - Ekki nógu góð frammistaða

1 - Slakur leikur