Fagna mögulegri niðurfellingu snakktolls

Félag atvinnurekenda fagnar því að meirihluti efnahags- og viðskiptanefndar Alþingis vilji fella niður tolla á snakki. Snakk hefur borið 59 prósenta toll og mun verð til neytenda lækka töluvert við þessa breytingu, sem til stendur að gera um áramótin.

Í tilkynningu á vef FA segir þó að af einhverjum ástæðum nái breytingin ekki yfir snakk sem unnið sé úr kartöflumjöli, eins og hið sívinsæla Pringles.

„FA fagnar eindregið þessari tillögu,“ segir Ólafur Stephensen, framkvæmdastjóri FA, í tilkynningunni.



Sjá einnig:Efnahags- og viðskiptanefnd vill fella niður tolla á dömubindi og snakk

„Meirihluti efnahags- og viðskiptanefndar viðurkennir að þessi tollur hafi verið alltof hár. Tollaniðurfellingin ætti að vera víðtækari, en með þessu er þó höggvið nýtt skarð í matartollmúrana. Þarna er viðurkennt að það er ekkert vit í að leggja ofurtolla á innflutning sem keppir ekki við neina innlenda framleiðslu. Með slíkri tollheimtu er ekki verið að vernda neitt heldur eingöngu að skaða neytendur, sem dirfast að leggja sér erlend matvæli til munns. Í því felst mikið gerræði.“



Félag atvinnurekenda hefur barist fyrir afnámi snakktollsins um árabil. Fyrr á árinu höfðu Hagar, Aðföng, Innness og Ölgerðin höfðað mál vegna tollsins og var farið fram á endurgreiðslu. Fyrirtækin töpuðu þó málinu í Héraðsdómi Reykjavíkur.

Sjá einnig: Snakktollur ríkisins ekki ólöglegur

Ólafur segir nú að einsýnt sé að sterkari rök séu fyrir því að málið vinnist í Hæstarétti þegar löggjafinn hefur viðurkennt að tollarnir hafi verið ómálefnalega háir.