Bikarmeistararnir skiptu um gír í seinni hálfleik

Grótta náði fjögurra stiga forskoti á toppi Olís-deildar kvenna í handbolta með sex marka sigri á FH á heimavelli í dag, 19-13.

FH, sem er í 10. og þriðja neðsta sæti deildarinnar, hélt í við toppliðið í fyrri hálfleik en staðan að honum loknum var 7-7. Gróttukonur, sem urðu bikarmeistarar um síðustu helgi, gáfu svo í í seinni hálfleik og lönduðu að lokum sex marka sigri.

Karólína Bæhrenz Lárudóttir og Lovísa Thompson skoruðu fimm mörk hvor fyrir Gróttu en Ingibjörg Pálmadóttir var markahæst í liði FH með fjögur mörk.

Mörk Gróttu:

Karólína Bæhrenz Lárudóttir 5, Lovísa Thompson 5, Anna Úrsúla Guðmundsdóttir 4, Laufey Ásta Guðmundsdóttir 2, Arndís María Erlingsdóttir 2, Eva Margrét Kristinsdóttir.

Mörk FH:

Ingibjörg Pálmadóttir 4, Aníta Mjöll Ægisdóttir 2, Heiðdís Rún Guðmundsdóttir 2, Steinunn Snorradóttir 1, Rakel Sigurðardóttir 1, Birta Þöll Sveinbjörnsdóttir 1, Rebekka Guðmundsdóttir 1, Sara Kristjánsdóittir 1.