Skákhátíð hafin í Laugardalshöll

Evrópumót landsliða í skák hófst í dag í Laugardalshöll en mótið er stærsti skákviðburðurinn hér á landi frá 1972 þegar Bobby Fischer og Boris Spasskíj háðu einvígi um heimsmeistaratitilinn í sama húsi. Í kringum 450 erlendir gestir eru komnir til landsins vegna mótsins.

„Þetta gekk allt saman stóráfallalaust fyrir sig í dag,“ segir Gunnar Björnsson forseti Skáksambands Íslands í samtali við Vísi en þrjátíu sjálfboðaliðar sjá til þess að allt gangi smurt fyrir sig. Smá vesen uppgötvaðist skömmu áður en umferðin hófst en enska fánann vantaði þar sem hann var ekki til í utanríkisráðuneytinu eða Laugardalshöll. Breska sendiráðið hljóp hins vegar undir bagga og græjaði enskan fána.

Þrjátíu sveitir taka þátt í kvennaflokki en 36 í opnum flokki. Í kvennaflokki bera Rússland, Úkraína og Georgía höfuð og herðar yfir aðrar sveitir og er búist við því að einhver þeirra standi uppi sem sigurvegari. Karlaflokkurinn er öllu jafnari en líklegt má telja að Rússar, Úkraínumenn, Azerbaijan, Holland eða Frakkland muni vinna.

Mótið stendur yfir til 22. nóvember og verða tefldar níu umferðir. Skákmennirnir fá einn frídag en annars verður teflt á hverjum degi. Skákskýringar verða á staðnum en í dag sá stórmeistarinn Þröstur Þórhallsson um þær. Á morgun verður það stórmeistarinn Helgi Áss Grétarsson.

Ísland sendir tvær sveitir til leiks, eina aðalsveit og aðra „gullaldarsveit“ en sú síðari samanstendur af fjórmenningunum sem skipuðu sveitina á Ólympíumótinu í Dubai 1986 auk Friðriks Ólafssonar. Íslenska sveitin mætti firnasterkri sveit Armena í fyrstu umferð en kempurnar öttu kappi við Hollendinga.

Margir sterkustu skákmenn heims taka þátt á mótinu og má þar nefna heimsmeistarann Magnus Carlsen frá Noregi, Armenann Levon Aronian, hinn franska Maxime Vachier-Lagarve og Tékkann David Navara. Navara laut óvænt í gras fyrir hinum Sune Berg Hansen en það tryggði Dönum 2 ½ - 1 ½ sigur á Tékkum. Beinar útsendingar með skýringum má nálgast hér og hægt er að fylgjast með stöðunni hér og hér.