Ísland tapaði fyrir Ungverjum: „Í fyrsta skipti í langan tíma sem maður var stressaður“

„Mér fannst við bara sýna alla þá baráttu sem við höfum yfir að ráða,“ segir Gunnhildur Gunnarsdóttir, leikmaður íslenska landsliðsins í körfubolta, eftir tap gegn Ungverjalandi, 72-50, í fyrsta leik liðsins í undankeppni EM.

Helena Sverrisdóttir var stigahæst í liði Íslendinga með 16 stig. Gunnhildur skoraði 12 stig og stal þremur boltum í leiknum en hún er að spila í gegnum bakmeiðsli.

„Við lögðum allt í leikinn og það er rosalega erfitt að eiga við stelpur inni í teig sem eru rúmlega tveir metrar. Mér fannst við gera vel og við lögðum okkur allar fram.“

Gunnhildur segir að hún hafi alveg gleymt meiðslunum í leiknum.

„Ég gerði bara eins vel og ég gat og lagði allt í leikinn. Við sem lið gerðum þetta bara vel og ég er rosalega ánægð með þá baráttu sem við sýndum.“

Pálína Gunnlaugsdóttir  gerði tíu stig í leiknum og tók fimm fráköst á móti mun hærri leikmönnum en hún er sjálf.

„Þær eru með eina sem er tveir núll átta á hæð og það er bara virkilega erfitt fyrir okkur að eiga við það,“ segir Pálína í samtali við Óskar Ófeig Jónsson, íþróttafréttamann 365, eftir leikinn.

„Við hefðum geta gert örlítið betur í kvöld. Við vorum pínu óheppnar með þriggja stiga skotin en það var samt ekki þess valdandi að við töpuðum leiknum. Vörnin var virkilega góð á köflum og hélt rosalega vel.“

Pálína segir að liðið þurfi bara að læra að spila svona leiki.

„Mér langar í raun að spila aftur við þær á morgun. Ég er orðin 28 ára gömul og þetta er í fyrsta skipti í mjög langan tíma sem ég finn fyrir einhverju alvöru stressi fyrir leik. Ég hlakka bara til að spila aftur á miðvikudaginn.“

Stig númer 1000 og 1001 hjá Helenu Sverrisdóttur með islenska landsliðinu.

Posted by KKÍ - Körfuknattleikssamband Íslands on 21. nóvember 2015