Rosberg: Ég væri til í að byrja næsta tímabil á morgun

Nico Rosberg kom fyrstur í mark í lokakeppni tímabilsins, hann var þar með sína þriðju keppni í röð. Mercedes bætti stigametið í heimsmeistarakeppni bílasmiða, með því að ná fyrsta og öðru sæti í keppni dagsins. Hver sagði hvað eftir keppnina?

„Síðan í Austin hef ég verið gríðarlega sterkur. Ég væri til í að byrja næsta tímabil á morgun. Hver þarf frí þegar það gegnur svona vel? En þetta er frábær leið til að enda tímabilið,“ sagði Rosberg eftir keppnina.

„Þetta hefur verið ótrúlegt ár. Ég er mjög hamingjusamur að það er búið. Mér fannst ég hefði getað klárað keppnina með einu stoppi en fyrst ég gerði það ekki þá var skynsamlegra að stoppa fyrr en seinna,“ sagði Lewis Hamilton eftir keppnina.

„Það gekk vel um helgina, bíllinn var góður og liðið stóð sig vel. Við höfðum bara ekki það sem þarf til að komast nógu nálægt Mercedes,“ sagði Kimi Raikkonen eftir keppnina.

„Þetta atvik með Valtteri Bottas truflaði þjónustuhléið mitt. Ég tók fram úr Marcus Ericsson sem var gaman. Við þurfum að bæta allan bílinn í heild sinni í vetur,“ sagði Jenson Button sem kom í mark í 12. sæti á McLaren.

„Ég setti ofurmjúku dekkin undir bensínléttan bíl vara til að sjá hversu góður bíllinn er á þeim. Stefna Formúlu 1 þarf að breytast. Aðrir kappakstursflokkar eru að stela athyglinni. Það þarf að auka stöðugleika í refsingum og ákvörðunum dómaranna,“ sagði Fernando Alonso sem kom í mark í 17. sæti á McLaren bílnum.

„Tímabilið hefur verið frábært. Við bættum vissulega einhver met en það skiptir ekki öllu máli. Liðið er að standa sig gríðarlega vel og við erum hamingjusöm. Ég get ekki útskýrt skyndilegan viðsnúning Rosberg. Það er einkennilegt en eitthvað hefur breyst í hausnum á honum. Lewis fékk að velja keppnisáætlun í dag en það breytti engu, Nico var einfaldlega fljótari í dag,“ sagði Toto Wolff, keppnisstjóri Mercedes liðsins.

Wolff bætti við að Ferrari væri líklegt til að nálgast Mercedes í vetur, hann sagði líka að Red Bull væri mögulega að fara að taka miklum framförum í vetur.

„Ég er ánægður með keppnina. Þegar maður gerir allt sem maður getur þá er ekki annað hægt en að vera sáttur. Tímabilið í heild sinni hefur verið mjög gott, sennilega mitt besta hingað til. Ég vona að ég verði enn betri á næsta ári. Þriðja sætið í Rússlandi var klárlega mín besta frammistaða í ár,“ sagði Sergio Perez sem endaði í fimmta sæti á Force India bílnum.

„Við hefðum ekki getað náð betri árangri en við gerðum. Við erum að ná stöðugum framförum. Við vorum töluvert lengra á eftir Mercedes síðasta vetur en við erum akkurat núna. Það er hægt að sigrast á Mercedes, við viljum komast framfyrir þá og við vitum að við getum náð miklum framförum í vetur. Það er mikil vinna framundan,“ sagði Sebastian Vettel sem kom í mark í fjórða sæti á Ferrari bílnum.

„Ég er hvað ánægðastur að Sebastian komst í gegnum þvöguna og lagaði mistökin mín síðan í gær. Klúðrið í tímatökunni var algjörlega mér að kenna. Við verðum að reyna að halda rétt á spöðunum í vetur,“ sagði James Allison, tæknistjóri Ferrari.