Sergio Garcia lék best á fyrsta hring á BMW meistaramótinu

Spánverjinn vinsæli, Sergio Garcia, leiðir eftir fyrsta hring á BMW meistaramótinu sem fram fer á Lake Malaren vellinum í Shanghai í Kína.

Garcia lék frábært golf, fékk 9 fugla á fyrstu 14 holurnar og kláraði hringinn á 64 höggum eða átta undir pari.

Suður Kóreumaðurinn An Byeong Hun og Frakkinn Victor Dubuisson deila öðru sætinu á sjö höggum undir pari en sá síðarnefndi sigraði einmitt á Turkish Airlines mótinu í síðustu viku og virðist vera í frábæru formi.

Mörg þungavigtarnöfn byrjuðu einnig vel á fyrsta hring en Englendingarnir Justin Rose og Paul Casey eru á fimm undir, Ian Poulter og Henrik Stenson léku á fjórum höggum undir pari og fyrrum besti kylfingur heims, Martin Kaymer er á þremur undir.

BMW meistaramótið er eitt veglegasta mót ársins á Evrópumótaröðinni og verðlaunaféð gífurlega hátt en það verður í beinni útsendingu á Golfstöðinni um helgina.