Leggja til að staðsetning nýs spítala verði endurmetin

Rannsóknarstofnun atvinnulífsins við Háskólann á Bifröst leggur til að áform um byggingu nýs Landspítala við Hringbraut verði endurskoðuð og rekstrarformi á hluta starfsemi spítalans verði breytt. Þetta kemur fram í nýrri skýrslu stofnunarinnar sem kynnt var í morgun.

Í skýrslunni er meðal annars bent á að hægt sé að byggja nýtt sjúkrahús á betri stað en við Hringbraut enda sé hagkvæmara og skynsamlegra út frá skipulagsmálum að byggja nær miðju höfuðborgarsvæðisins. Þar megi byggja sambærileg sjúkrahús og verið er að byggja á Norðurlöndunum um þessar mundir en þau eru hærri en hægt er að byggja við Hringbraut, sökum nálægðar við flugvöllinn.

Á nýjum stað yrði hægt að byggja nútímalegt sjúkrahús frá grunni sem taki ekki eins mikið pláss. Við Hringbraut þarf ennfremur að endurbyggja stóran hluta af gömlu og illa förnu húsnæði og benda skýrsluhöfundar á það í skýrslunni að kostnaður við þær framkvæmdir sé að öllum líkindum stórlega vanmetinn.

Byggingar og tæki verði í eigu opinbers hlutafélags

Einnig er lagt til að öllum fyrirhuguðum byggingaframkvæmdum verði frestað þangað til endurmati á kjarnastarfsemi Landspítala, byggingu og rekstri dag- og göngudeildar og staðsetningu nýs Landspítala sé lokið. Í framhaldinu verði gerðir nýir kostnaðarútreikningar.

Byggingar og tæki sem Landspítali mun nota í framtíðinni verði í eigu og umsjón opinbers hlutafélags sem og núverandi byggingar og tæki og áframleigt þaðan til LSH og hugsanlega til annarra heilbrigðisaðila. Einnig er tillaga að kennslu-, rannsóknar- og vísindastarfsemi verði sett í fastara form og samningar verði gerðir við menntastofnanir um hlutverk spítalans. Þannig fái stofnunin viðeigandi greiðslur fyrir að sinna því hlutverki.

Þá er lagt til að tekið verði upp nýtt fyrirkomulag fjárveitinga til spítalans, blöndu af fastri fjárveitingu og afkastatengdri fjárveitingu.

Nánar verður fjallað um málið í kvöldfréttum Stöðvar 2.