Skoða útvistun og sameiningu mötuneyta

Hægt er að spara 400 til 500 milljónir króna á ári með breytingum á fyrirkomulagi mötuneytisþjónustu Reykjavíkurborgar í grunn- og leikskólum. Þetta er niðurstaða starfshóps um fjárhag skóla- og frístundasviðs.

Markmið hópsins var að leita leiða til að bæta þjónustu sviðsins og auka hagkvæmni í rekstri en borgin rekur um það bil hundrað mötuneyti. Tvær tillögur komu frá hópnum að breyttu fyrirkomulagi mötuneytisþjónustu. Í fyrsta lagi að þjónustan verði útvistuð þar sem slíkt er talið hagkvæmt og fýsilegt, með tilliti til aðbúnaðar, starfsmannahalds og svo framvegis. Í öðru lagi að aukið samstarf verði milli starfsstöðva innan sama hverfis.

Skúli Helgason, formaður Skóla- og frístundasviðs, segir að fyrir utan almenna hagræðingu þarfnist mörg mötuneyti endurnýjunar eða séu í óheppilegu rými. Í þeim tilfellum gæti verið hagkvæmara að bjóða þjónustuna út eða fara í samstarf við aðra skóla en að fara í kostnaðarsamar endurbætur.

„Á mörgum stöðum í borginni eru leikskólar, skólar og frístundaheimili á sama blettinum og kannski ekki hagkvæmt að vera með fullbúin eldhús að framleiða mat á öllum þessum stöðum.“

Skúli bætir við að einnig sé erfitt á sumum stöðum að manna stöður í mötuneytunum og sameining eða útvistun gæti verið lausn á þeim vanda.

„Það hefur verið erfitt að fá matráða í þessi störf enda vaxandi ásókn í matreiðslufólk í atvinnulífinu, meðal annars út af uppbyggingu ferðaþjónustu.“

Nýlega var fyrsta skrefið stigið í þessari vinnu með því að senda könnun til allra stjórnenda leik- og grunnskóla. Kallað er eftir viðhorfum þeirra til mismunandi valkosta; það er útvistunar, samstarfs á hverfagrunni eða óbreytts ástands.

„Við ætlum að vinna þetta í nánu samstarfi við skólana. Þetta snýst í grunninn um að nýta fjármunina vel og nýta þá í góða þjónustu við börnin sjálf í stað þess að binda þá í húsnæðiskostnað eða stoðþjónustu sem væri ef til vill hægt að sinna með betri og hagkvæmari hætti.“

Skúli segir að ekki verði slegið af kröfum um hollan og fjölbreyttan mat. „Í svona stóru kerfi eins og hjá okkur þá er mismunandi eftir stöðum hversu góð þjónustan er. 

Framtíðartakmarkið er að sjálfsögðu að þjónustan sé góð alls staðar og ef við bjóðum þjónustuna út verða gerðar samræmdar kröfur um gæði. Okkar stefna er sú að gæðin verði jafn mikil eða meiri en þau eru í dag.“