Halldór sitji ekki beggja vegna borðsins

Fráfarandi formaður Varðar, fulltrúaráðs sjálfstæðisfélaganna í Reykjavík, gagnrýnir að Halldór Halldórsson, oddviti flokksins í borginni, sitji beggja vegna borðs þar sem hann sé á sama tíma oddviti og formaður Sambands íslenskra sveitarfélaga. Þetta kom fram á aðalfundi Varðar á þriðjudag.

„Bent var á það í upphafi kjörtímabils að það væri veruleg hætta á að það færi ekki saman að vera oddviti flokksins í Reykjavík og formaður Sambands sveitarfélaga. Það er alveg ljóst að annar hvor titillinn verður að víkja ef trúverðugleiki og traust á að skapast á borgarstjórnarhópnum okkar,“ sagði Óttarr Guðlaugsson, fráfarandi formaður, á fundinum.

Halldór Halldórsson segist ekki skilja skoðun Óttars. „Hann telur kannski líka að það sé ekki hægt að vera oddviti Sjálfstæðisflokksins og sitja í stjórn Faxaflóahafna, eða í stjórn Orkuveitunnar og ekki hægt að vera formaður Sjálfstæðisflokksins og vera um leið þingmaður og ráðherra. Þetta er bara í mínum huga tóm vitleysa, vegna þess að til að geta verið formaður sambandsins þá verður maður að vera sveitarstjórnarmaður,“ segir Halldór.