Síminn laut í lægra haldi gegn ríkinu

Íslenska ríkið hefur verið sýknað af kröfu Símans vegna endurákvörðunar Ríkisskattstjóra á opinberum gjöldum Símans og Skipta fyrir árið 2008 á þeim grundvelli að vaxtagjöld hefðu verið offærð í skattskilum. Þetta er niðurstaða Héraðsdóms Reykjavíkur sem birti dóminn í dag.

Síminn fór fram á að ákvörðun Ríkisskattstjóra yrði ógilt. Um væri að ræða vaxtagjöld vegna lána sem tekin höfðu verið vegna kaupa Skipta ehf. á Símanum hf. árið 2005.

Síminn bakfærði vaxtagjöld að fjárhæð 22,6 milljarðar króna sem tengist ágreiningi við Ríkisskattstjóra árið 2013. „Með því voru að fullu leyti tekin inn neikvæð áhrif á afkomu félagsins vegna framangreinds úrskurðar á því tímabili sem var til skoðunar. Þar sem Síminn hf. hefur þegar tekið fullt tillit til úrskurðar Ríkisskattstjóra í reikningsskilum félagsins hefur dómurinn ekki áhrif á afkomu Símans hf.,“ segir í tilkynningu frá Símanum.

Þá var Símanum gert að greiða 1,2 milljónir króna í málskostnað.

Síminn hefur ekki tekið ákvörðun um hvort dómnum verði áfrýjað til Hæstaréttar.