ASÍ spáir 3,8 prósent verðbólgu árið 2016

Samkvæmt nýrri spá hagdeildar ASÍ má gera ráð fyrir 3,8 prósent verðbólgu árið 2016. ASÍ spáir svo 3,5 prósent verðbólgu árið 2017. Hagdeildin spáir því að umsvif í hagkerfinu muni vaxa hratt á næstu árum, verðbólga muni fara yfir markmið Seðlabankans og hætta á ofhitnun í hagkerfinu mun aukast gangi spá hagdeildar eftir.

Góður hagvöxtur verður næstu tvö árin. Hagvöxturinn verður drifinn áfram af vexti þjóðarútgjalda, þar sem einkaneysla og fjárfestingar vaxa mikið og gangi spáin eftir fara fjárfestingar yfir 20 prósent af landsframleiðslu á spátimanum. ASÍ spáir 4,3 prósent aukningu í landsframleiðslu árið 2015, 4,1 prósent árið 2016 og 3,3 prósent árið 2017.

ASÍ telur mikilvægt við núverandi aðstöður í hagkerfinu að ríki og sveitarfélög sýni aðhald í rekstri en sú sé ekki raunin. Mikilvægt sé að rjúfa þann vítahring að hver hópur á vinnumarkaði hefur farið fram og reynt að rétta sinn hlut óháð því hvaða áhrif slíkt hefði á aðra hópa eða hagkerfið. Jafna þarf stöðu ólíkra hópa á vinnumarkaði og vinna að því að launahækkanir samræmist efnahagslegum stöðugleika til lengri tíma. Spá ASÍ byggir á þeirri forsendu að það takist, ef ekki verða verðbólguhorfur mun lakari en í spánni.

Spáin gerir ráð fyrir að atvinnuleysi verði 3,1 prósent 2015, 3 prósent 2016 og 2,9 prósent 2017. Einnig er spáð áframhaldandi aukningu ferðamenna hér á landi. Því er ólíklegt að innlent vinnuafl geti að öllu leyti mætt aukinni eftirspurn eftir vinnuafli, t.d. í mannvirkjagerð og ferðaþjónustu.