Innlent

Hnífur stakkst í læri sjómanns eftir ranga tilsögn

Jóhann Óli Eiðsson skrifar
Nýliðafræðslu var ábótavant um borð í Ásbirni RE-050.
Nýliðafræðslu var ábótavant um borð í Ásbirni RE-050. vísir/gva
Rannsóknarnefnd sjóslysa lýsir furðu sinni á því að nýliða á skipinu Ásbirni RE-050 hafi ekki verið leiðbeint á þann hátt er gert er ráð fyrir í 8. gr. sjómannalaga nr. 35/1985. Nefndin hefur skilað skýrslu vegna atviks sem átti sér stað um borð í skipinu þann 8. mars síðastliðinn.

Skipið var á veiðum á suðvestur miðum í allhvössum vindi en ölduhæð var um sex metrar. Skipverjar voru að störfum á trollþilfari er hnífur eins þeirra, sem hann hafði í vasa sínum, stakkst djúpt í læri hans. Talsvert blæddi úr sárinu og var þyrla Landhelgisgæslunnar send til skipsins en hún gat ekki athafnað sig sökum veðurs. Var því siglt með hann til Helguvíkur.

Skipverjinn hafði fengið hníf fyrsta dag sinn um borð en týnt honum þar sem hann hafði ekki hulstur um hann. Yfirmenn hans sögðu honum þá að finna sér nýjan og geyma hann í vasanum sem hann gerði eftir nokkur mótmæli. Hnífurinn var ætlaður til að vinna með í netum og fyrir mistök hafði láðst að brjóta oddinn af honum.

Fram kemur í skýrslunni að enginn sérstök nýliðafræðsla sé um borð heldur sé mönnum aðeins sagt til. Ásbjörn RE-050 er 652 brúttótonna ístogari í eigu HB Granda.

Að skilaði rannsóknarnefndin tveimur skýrslum er varða Selfoss, skip Eimskips. Í öðru þeirra hafði skipverji fallið þegar laus álstigi sem hann stóð í rann til á skipinu. Reyndist skipverjinn óbrotinn og vinnufær en þeirri ábendingu er beint til sjómanna að nota ekki lausa stiga um borð í skipum. Í hinu tilvikinu fótbrotnaði skipverji þegar hann steig á lausa þvingu með þeim afleiðingum að hann féll niður á þilfar.


Tengdar fréttir

Drukkinn skipstjóri sýknaður af ölvunarsiglingu

Skipstjóri Ásbjarnar RE-50 var sýknaður af því að stýra skipinu drukkinn í Héraðsdómi Reykjavíkur í gær. Skipstjórinn kom til lands í janúar síðastliðnum og var þá verulega drukkinn. Hann viðurkenndi að hann hefði drukkið rauðvínsglas og nokkra bjóra. Það hefði hann hinsvegar gert eftir að 1. stýrimaður tók við stjórn skipsins.

HB Grandi semur um þrjá nýja togara

Síðastliðinn föstudag voru samningar um smíði þriggja nýrra ísfisktogara undirritaðir á skrifstofu HB Granda. Samningarnir hljóða upp á 43.950.000 EUR eða um 6,8 milljarða króna samtals. Áætlað er að fyrsta skipið afhendist í maí 2016, það næsta síðla árs 2016 og það þriðja vorið 2017.




Fleiri fréttir

Sjá meira


×