Reitir kaupir fasteignafélög fyrir sautján milljarða

Reitir fasteignafélag hf. hefur ákveðið að ganga til samninga við eigendur fasteignasjóðanna SRE I slhf. og SRE II slhf. sem eru í rekstri Stefnis hf., um kaup Reita á tilteknum fasteignafélögum. Heildarvirði kaupanna er samtals 17.980 milljónir króna.

Í tilkynningu frá Reitum segir að um sé að ræða tæplega 37.500 fermetra af húsnæði, meðal annars Hótel Borg og fasteignir við Borgartún, Fiskislóð, Faxafen og Þingvallarstræti á Akureyri.

Eignasafn Reita stækkar um níu prósent í fermetrum talið með kaupunum og áætlaður rekstrarhagnaður um átján prósent, að því er segir í tilkynningunni. Kaupin verða að fullu fjármögnuð með lánsfé og yfirtöku áhvílandi skulda.