Annar toppur hjá Össuri hagnaðist um 105 milljónir

Þorvaldur Ingvarsson, læknir og forstöðumaður rannsóknar og þróunar hjá stoðtækjaframleiðandanum Össuri, græddi í dag um 105 milljónir króna með kaupum og sölum á hlutabréfum í Össuri.

Þorvaldur nýtti sér ákvæði í kaupréttarsamningi sínum líkt og forstjórinn Jón Sigurðsson sem hagnaðist um 368 milljónir króna á sams konar viðskiptum í síðustu viku.

Þorvaldur keypti 350 þúsund hluti í dönsku kauphöllinni á 8,59 danskar krónur á hlut. Kaupverðið svarar til tæplega 60 milljóna íslenskra króna. Strax í kjölfarið, mínútu síðar samkvæmt upplýsingum úr kauphöllinni, seldi hann 343,911 hluti í Össuri á 480 krónur hlut í íslensku kauphöllinni eða fyrir um 165 milljónir króna. Hagnaðurinn er því um 105 milljónir króna.

Þorvaldur á enn eftir kauprétt að 225 þúsund hlutum sem hann getur innleyst.