Bandarísku ungstirnin í forystu á US Open - Tiger Woods náði nýjum lægðum og er úr leik

Toppbaráttan á US Open sem fram fer á Chambers Bay vellinum er gríðarlega spennandi en margir af bestu kylfingum heims eru ofarlega á skortöflunni eftir 36 holur.

Það þarf engan að undra að tvær stærstu stjörnur bandarísks golfs deili efsta sætinu en það gera þeir Jordan Spieth og Patrick Reed.

Þeir eru á fimm höggum undir pari en Branded Grace og Dustin Johnson koma næstir á eftir þeim á fjórum höggum undir pari.

Johnson náði mest tveggja högga forystu á öðrum hring en hann endaði hringinn með tveimur skollum.

Sigurvegari síðasta árs, Martin Kaymer, náði ekki niðurskurðinum í titilvörninni en hann endaði á sex höggum yfir pari, tveimur höggum verri en besti kylfingur heims, Rory Mcilroy, sem rétt náði í gegn um niðurskurðinn á fjórum höggum yfir pari.

Tiger Woods var samur við sig og lék illa á öðrum hring, fékk átta skolla og tvo fugla og endaði hringinn á 76 höggum eða sex yfir pari. Hann lék því hringina tvo á samtals 16 höggum yfir pari en Woods hefur aldrei leikið jafn illa yfir 36 holur á atvinnumannaferlinum.

20 kylfingar eru á innan við fimm höggum frá efsta sætinu og því ættu næstu tveir hringir að verða spennandi en Chambers Bay völlurinn hefur reynst bestu kylfingum heims mjög erfiður hingað til.