Síminn verður skráður á markað í haust

Síminn, stærsta fjarskiptafyrirtæki landsins, verður skráð í Kauphöll Íslands næsta haust. Þetta kom fram í máli Orra Haukssonar, forstjóra Símans á Kauphallardögum Arion Banka fyrr í dag.

Orri sagði jafnframt að verið væri að undirbúa fyrirtækið fjárhagslega undir skráninguna.

Arion Banki er stærsti hluthafi Skipta, móðurfélags Símans, en bankinn á tæplega 40% hluti í fyrirtækinu.Lífeyrissjóðir eiga einnig stóran hlut í félaginu.

Síminn verður því líklega þriðja fyrirtækið sem skráð verður í Kauphöllina á þessu ári. Fasteignafélögin Reitir og Eik verða bæði skráð á markað í þessum mánuði.