Skrifstofustjórinn dregur til baka framboð sitt til stjórnar VÍS

Maríanna Jónsdóttir, skrifstofustjóri skrifstofu skattamála í fjármála- og efnahagsráðuneytinu, hefur dregið til baka framboð sitt til stjórnar VÍS.

Í tilkynningu frá Maríönnu kemur fram að ákvörðunin hafi verið tekin vegna umræðu sem framboð hennar hafi skapað og höfuðmáli skipti fyrir hag hvers fyrirtækis að trúverðugleiki ríki um stjórn þess.

Sjá einnig: Skrifstofustjóri í stjórnarframboði

Ýmsar spurningar vöknuðu um hagsmunárekstra yrði Maríanna kosinn til stjórnarsetu í VÍS því fyrirtækið lýtur eftirliti Fjármálaeftirlitsins.

Maríanna naut stuðnings Lífeyrissjóð starfsmanna ríkisins en A-deild sjóðsins á 6,42 prósent í fyrirtækinu. „Við þekkjum Maríönnu afskaplega vel. Hún starfaði lengi í stjórn lífeyrissjóðsins og oftar en ekki sem formaður eða varaformaður. Þegar sú hugmynd kom upp, þá var svona gengið úr skugga um það hvort þetta samrýmdist hennar stöðu innan fjármálaráðuneytisins. Það kom svar að þeir sæju enga meinbugi á því. Og þá stöndum við á bak við framboð hennar,“ var haft eftir Árna Stefáni Jónsson, formanni stjórnar Lífeyrissjóðs starfsmanna ríkisins í Fréttablaðinu í dag.

Í svari fjármálaráðuneytisins við fyrirspurn Fréttablaðsins kom einnig fram að ekki giltu takmarkanir um stjórnarsetu starfsmanna ráðuneytisins að undanskilum skrifstofum efnahagsmála og fjármálamarkaðar og lögfræðisviðs.

Í kjölfar þess að Maríanna hefur dregið framboð sitt til baka er sjálfkjörið í stjórn VÍS en hana munu skipa: Ásta Dís Óladóttir, Bjarni Brynjólfsson, Guðrún Þorgeirsdóttir, Helga Jónsdóttir og Steinar Þór Guðgeirsson.