Um fjörutíu drengjum rænt af liðsmönnum Boko Haram

Liðsmenn hryðjuverkasamtakanna Boko Haram eru grunaðir um að hafa rænt um fjörutíu drengjum og ungum karlmönnum í áhlaupi á afskekkt þorp í norðausturhluta Nígeríu.

Aðrir íbúar bæjarins Malari í Borno-héraði komu til héraðshöfuðborgarinnar Maiduguri á föstudaginn og sögðu drengina hafa verið numda á brott á gamlársdag.

Boko Haram hefur staðið fyrir árásum í landinu frá árinu 2009 og stefna að því að koma á íslömsku ríki á svæðinu.

Íbúar Malari segja að árásarmennina hafa komið inn í þorpið á bílum sínum og fyrirskipað öllum karlmönnum að safnast saman og hlýða á prédikun. Mönnunum hafi þá verið rænt og farið með þá inn í nálægan skóg.

Í síðasta mánuði gerðu Boko Haram-liðar áhlaup á annað þorp, Gumsuri, og segir einn íbúa að 33 þorpsbúar hafi verið myrtir og um tvö hundruð manns rænt.

Rúmlega tvö þúsund manns létust í árásum liðsmanna Boko Haram í norðausturhluta Nígeríu á síðasta ári.

Liðsmenn Boko Haram rændu um tvö hundruð stúlkum frá heimavistarskóla í Borno í apríl á síðasta ári. Ránið vakti mikla athygli, en þrátt fyrir hernaðarlega aðstoð frá Kína, Frakklandi, Bretlandi og Bandaríkjunum hefur enn ekki tekist að bjarga stúlkunum.