Ágúst: Væri frábært að vinna

Íslenska kvennalandsliðið í handbolta mætir Svartfjallalandi klukkan 14.30 í Laugardalshöll á morgun, en stelpurnar eru níu mörkum undir eftir fyrri leikinn.

Sigurvegarinn í einvíginu fer á HM seinna á árinu, en íslenska liðið tapaði stórt eftir að byrja vel í síðasta leik.

„Við byrjum mjög vel og komum af krafti inn í leikinn en svo fjaraði undan þessu hjá okkur,“ segir Ágúst Jóhannsson, landsliðsþjálfari.

Sjá einnig:Draumurinn er að komast áfram

„Við fórum að skjóta of snemma og hættum að spila okkur í góð færi.“

„Svartfellingarnir gengu á lagið en við megum ekki gleyma því að við erum að spila við eitt allra besta landslið heims.“

„Það var kannski pínu óvænt að vera komin sex mörkum yfir svona nemma en fjögurra til fimm marka tap hefði ekki verið óeðlilegt miðað við hvernig leikurinn spilaðist,“ segir Ágúst.

Verkefnið er mjög erfitt en Ágúst vill bara sjá hetjulega frammistöðu í Höllinni á morgun.

„Það yrði frábært að vinna þær, en auðvitað vil ég bara sjá baráttuglatt íslenskt landslið. Ég vil sjá stelpurnar gefa allt í þetta og njóta þess að spila þar sem þetta er okkar síðasti leikur í bili,“ segir hann.

Yngri leikmenn hafa verið að spila vel að undanförnu og sér Ágúst fram á bjarta tíma hjá landsliðinu.

„Eins og áður hefur komið fram vantar nokkra leikmenn hjá okkur en það eru stelpur að koma inn sem eru að fá stærri hlutverk eins og Hrafnhildur Hanna, Steinunn Hansdóttir og fleiri sem eru að standa sig vel. Það er klárlega björt framtíð í kvennaboltanum, það er engin spurning.“