Árangurslaust fjárnám hjá Hilmari Leifs

Árangurslaust fjárnám var gert hjá Hilmari Þór Leifssyni þann 21. september síðastliðinn. Það var gert vegna málskostnaðarkröfu DV ehf. eftir málaferli Hilmars gegn Reyni Traustasyni og Jóni Trausta Reynissyni, sem áður voru ritstjórar DV. Hilmar höfðaði tvö mál vegna sömu fréttarinnar, sem birtist annars vegar í DV og hins vegar á DV.is, í ágúst 2012.

Þar var fullyrt að hann tengdist glæpasamtökunum Hells Angels og væri háttsettur meðlimur glæpasamtakanna. Þá var hann einnig nafngreindur og sagt að mánaðarlaun hans væru 19 þúsund krónur samkvæmt gögnum ríkisskattstjóra. Í stefnu Hilmars stóð að fréttin yrði ekki skilin öðruvísi en svo að framgreind mánaðarlaun hans væru vegna starfa hans í undirheimunum.

Hilmar vildi ekki vera kenndur við Hells Angels samtökin, en hann tapaði málunum bæði fyrir Héraðsdómi Reykjavíkur og Hæstarétti.

Samkvæmt heimildum Vísis var fjarnámið reynt vegna 1.250 þúsund króna málskostnaðarkröfu DV. Fjárnám telst árangurslaust ef aðilinn sem um ræðir á engar eða ekki nægilegar eignir til að tryggja kröfuna. Þá geta þeir sem eiga kröfuna farið fram á gjaldþrotaskipti fyrir dómi.