296 milljóna gjaldþrot fiskeldis Brims

Gjaldþrotaskiptum í BBF 2014 ehf., sem áður hét Brim Fiskeldi ehf. er lokið. Ekkert fékkst upp í lýstar kröfur sem námu 295,8 milljónum króna að því er kemur fram í Lögbirtingarblaðinu í dag.

Upphaf starfseminnar voru þorskeldisrannsóknir Útgerðarfélags Akureyrar sem hófust í maí 2001. Brim fiskeldi var svo stofnað utan um starfsemina í maí 2003.  Félagið fangaði þorsk til áframeldis við Norðurland ásamt því að taka klakinn og villt þorskseiði til útsetningar.

Félagið var lýst gjaldþrota í mars á þessu ári.  Brim fiskeldi var meðal stærstu fyrirtækja að fanga þorsk til áframeldis og átti hlut seiðaeldisstöð Nauteyrar við Ísafjarðardjúp að því er kemur fram í frétt Morgunblaðsins um gjaldþrotið.

Félagið fékk starfs- og rekstrarleyfi fyrir 1200 tonna ársframleiðslu á Nunnuhólmum og Skjaldavík og rekstrarleyfi fyrir 1000 tonn til viðbótar í Rauðuvík í Eyjafirði.