Forstjóraskipti hjá Jarðborunum

Baldvin Þorsteinsson mun láta af störfum sem forstjóri Jarðborana hf. í byrjun næsta árs. Sigurður Sigurðsson tekur við starfi forstjóra Jarðborana 1. janúar næstkomandi.

Sigurður hefur verkfræðimenntun frá Háskóla Íslands og DTH í Kaupmannahöfn. Hann hefur undanfarin tvö ár verið framkvæmdastjóri jarðgangafyrirtækisins Marti AS í Noregi. Marti AS er systurfélag ÍAV hf en áður starfaði Sigurður í 10 ár sem framkvæmdastjóri hjá ÍAV.

Þá var Sigurður framkvæmdastjóri Steypustöðvarinnar um eins árs skeið og framkvæmdastjóri Malbikunarstöðvarinnar Hlaðbær-Colas hf á árunum 1993-2002. Sigurður er 54 ára gamall, kvæntur og á þrjár dætur.

Baldvin tók við forstjórastöðu Jarðborana í ársbyrjun 2013 en mun setjast í stjórn félagsins og taka við stjórnarformennsku þegar hann lætur af starfi forstjóra.