Subway Jared dæmdur í 15 ára fangelsi

Fyrrum talsmaður Subway, Jared Fogle, var í dag dæmdur í fimmtán ára fangelsi fyrir kynferðisbrot gegn börnum og vörslu barnakláms. Hann er hvað þekktastur fyrir að hafa einungis borðað Subway-samlokur í þeim tilgangi að grenna sig.

Ákæran á hendur honum var í tveimur liðum. Annars vegar var hann sakaður um að hafa ferðast í þeim tilgangi að misnota börn kynferðislega og hins vegar fyrir að hafa greitt fyrir myndir og myndbönd af nöktum börnum.  Hann játaði sök.

Húsleit var gerð á heimili Fogle í júlí síðastliðnum, og í kjölfarið sleit Subway samningi sínum við hann. Þá hefur eiginkona hans óskað eftir skilnaði.

Fogle sendi frá sér yfirlýsingu þar sem hann sagðist iðrast gjörða sinna. Fjölskylda hans og vinir væru ekki síður fórnarlömb í málinu og bað þau afsökunar. Honum hefur verið gert að greiða fórnarlömbum sínum, sem eru fjórtán talsins, alls 1,4 milljónir dala.