Sigrún friðar hafnargarðinn

Sigrún Magnúsdóttir, settur forsætisráðherra, hefur fallist á tillögu Minjastofnunar frá 24. september síðastliðnum um að friða í heild sinni hafnargarð sem þverar lóðina að Austurbakka 2 í Reykjavík. Þetta kemur fram í tilkynningu frá forsætisráðuneytinu.

Forsætisráðuneytið mun á næstunni kalla saman hagsmunaaðila málsins til að kanna hvort ásættanleg lausn finnst í málinu, sem tryggir vernd þessara merku menningarminja en stuðlar jafnframt að því að byggingaráform á lóðinni nái fram að ganga í einhverri mynd.

Áður hafði borgarlögmaður gert athugasemd við það að Sigmundur Davíð Gunnlaugsson myndi friða hafnargarðinn og taldi hann vanhæfan vegna athugasemda sem hann hafði látið falla.