Ráðning fyrrverandi sveitarstjóra til PCC: „Skyldi hann ekki skammast sín neitt?“

Ráðning Bergs Elíasar Ágústssonar, fyrrverandi sveitarstjóra Norðurþings, til þýska fyrirtækisins PCC sætir töluverðri gagnrýni. Bergur var ötull stuðningsmaður kísilversins (eins og dæmin sýna hér, hér, hér og hér) og undirritaði meðal annars sameiginlega viljayfirlýsingu PCC og Norðurþings árið 2011 um byggingu kísilsversins.

Rúmt ár er síðan Bergur Elías hætti störfum sem sveitarstjóri en hann fór að vinna hjá Samtökum sveitarfélaga á Norðurlandi vestra (SSNV) um síðustu áramót. Aðspurður um ráðningu sína til PCC segir Bergur í samtali við RÚV að ekkert samkomulag hafi legið fyrir á milli hans og PCC um að hann myndi vinna fyrir þýska fyrirtækið þegar hann hætti störfum hjá Norðurþingi.

„Málið er nátturulega bara það að þetta er samfélagsverkefni, sem mun hafa staðið yfir í 10 ár fyrir norðan og það er bara þannig að þarna leggja allir hönd á plóg. Ef að ég get með einhverjum hætti gert að verkum að það gangi vel er það bæði sjálfsagt og eðlilegt, þetta snýst um samfélagið og áætlanir þess að byggja upp iðnað á þessu svæði,“ segir Bergur Elías við RÚV. Hann muni sinna ýmsum verkfefnum á meðan kísilverið sé í byggingu.

Rifja upp fleyg orð úr Draumalandinu

Illugi Jökulsson spyr á Facebook hvort Bergur Elías muni ekki skammast sín þegar hann haldi heim á leið í kvöld í ljósi nýja starfsins. Fjölmiðlamaðurinn setur greinilega stórt spurningamerki við ráðninguna.

Þá rifjar fólk upp orð John Perkins, sem oft er kenndur við bók sína Confessions of an Economic Hit Man, í kvikmyndinni Draumalandið eftir Andra Snæ Magnússon og Þorfinn Guðnason.

Í myndinni lýsir Perkins því hvernig stórfyrirtæki, sem vilja komast með stóriðju sína og tilheyrandi verksmiðjur inn í ný samfélög, kaupa opinbera starfsmenn - veiði fólk í net. Hann var sjálfur í því hlutverki og er fjallað um það í fyrrnefndri bók.

„Ein besta aðferðin er að finna opinberan starfsmann, bæjarstjóra eða eitthvað svoleiðis, sem hjálpar þér. Þú lætur hann vita að þegar hans tíð í embættinu ljúki munir þú ráða hann og greiða honum mjög há laun með miklum fríðindum,“ segir Perkins.

Þegar þessi maður fer heim til sín í kvöld, skyldi hann ekki skammast sín neitt?

Posted by Illugi Jökulsson on Tuesday, August 25, 2015

Ekki til mikils ætlast

„Það er ekki til mikils ætlast af þeim. Líklega verða þeir hvattir til að ræða við önnur sveitarfélög og sannfæra þá um ágæti næstu verkefna.“

Í Draumalandinu er ráðning Guðmundar heitins Bjarnasonar, fyrrum bæjarstjóra í Fjarðabyggð, tekin sem dæmi um slíka ráðningu í tengslum við umfjöllun Kárahnjúkavirkjun og byggingu álvers á Reyðarfirði. Að loknu starfi sem bæjarstjóri var Guðmundur ráðinn verkefnastjóri hjá Alcoa.

Bútinn úr myndinni má sjá hér að neðan í klippingu Láru Hönnu Einarsdóttur.