Björgólfur Thor fer fram á frávísun

Lögmaður Björgólfs Thors Björgólfssonar óskaði í morgun eftir þriggja vikna fresti til að skila inn greinargerð um frávísun málsins frá dómi. Hópmálsókn gegn Björgólfi var þingfest í morgun og voru þátttakendur 235 talsins.

Tuttugu og átta nýjar umsóknir um þátttöku bárust málsóknarfélaginu í gær. Fara þátttakendur því með hlutafé að nafnvirði rúmlega 617 milljónum króna, eða 5,51 prósent af hlutafé Landsbanka Íslands, eða um rúmlega helming þess hlutafjár sem ekki var í eigu Samson, Landsbankans eða félaga sem eru í slitameðferð.

Í tilkynningu frá málsóknarfélaginu segir að mestu hafi munað um umsókn félagsins Urriðahæðar ehf sem hafi framselt hlutafé og skaðabótakröfur Lífeyrissjóðs starfsmanna ríkisins og hjúkrunarfræðinga og fjögurra annarra lífeyrissjóða; Gildi, Stafa, Festa, og Lífeyrissjóð Vestmannaeyja.

„Þátttaka í málsóknarfélaginu er umfram upphaflegar væntingar og er því ljóst að félagið er mjög vel í stakk búið til að standa straum af kostnaði af málsókn og greiðslu málskostnaðar komi til þess,“ segir í tilkynningunni.

Telja að Björgólfur hafi leynt upplýsingum

Málsóknarfélagið telur að Björgólfur Thor hafi með saknæmum hætti leynt upplýsingum um eignarhald sitt á Landsbankanum til að komast undan reglum um birtingu upplýsinga um viðskipti bankans við hann. Þau viðskipti hafi verið umfangsmikil og langt yfir þeim mörkum sem Fjármálaeftirlitið heimilaði.

Þá byggir félagið málatilbúning sinn á því að Samson eignarhaldsfélag, sem var í eigu Björgólfs og föður hans, hafi allt frá árinu 2006 ráðið yfir meirihluta atkvæða í Landsbanka Íslands hf. og því hafi félagið haft skyldu til að gera öðrum hluthöfum yfirtökutilboð. Þetta hafi komið í ljós eftir að upplýst varð um umfangsmikil kaup Landsbankans á eigin bréfum sem meðal annars voru geymd í aflandsfélögum sem lutu stjórn bankans.